WILLEMSTAD.- Segun e rapòrt di Nashonnan Uní riba e situashon di refugiadonan Venezolano den region, akseso na servisio i kuido médiko ta un reto ku nan tin di konfrontá den nan pais, i esei ta indiká tambe dikon tin un kantidat grandi di Venezolanonan ku ta den nesesidat pa kuido médiko. No opstante ku e akseso na e sistemanan di kuido den Karibe ta un tiki difísil, por bisa ku nan tabatin akseso si den prinsipio den paisnan manera Repúblika Dominikana, Guyana i Trinidad & Tobago. Pero tin di rekonosé ku Venezolanonan tin hopi falta di rekurso, informashon i nan ta biba ku e miedu konstante di ser detené i deportá.

Pa loke ta e situashon aki na Kòrsou i tambe Aruba, Venezolanonan no tabatin akseso na e sistemanan aki, pero danki na e intervenshon di R4V i Nashonnan Uní ku e paisnan aki tambe a bai di akuerdo pa duna akseso na tur hende inkluyendo refugiadonan Venezolano sin importá nan status. I prinsipalmente esaki a konta pa nan tratamentu kontra COVID-19. Echo ta ku awendia esei ta posibel i prueba di esei ta ku gobièrnu a ofresé indokumentadonan pa nan por pasa i vakuná libremente na sierto sentronan di vakunashon. Asta a krea e posibilidat pa nan hasi uso di ‘walk in’ pa nan vakuná sin tin mester di registrá.

Aki na Kòrsou e akseso na kuido a konta ku sosten di un klínika lokal ku ta sirbi e poblashon Venezolano ku no ta registrá, i esaki a bai ku sosten di Nashonnan Uní. Asina por bisa ku den un aña di tempu mas ku 10.000 konsultá a ser tené pa un un grupo di alrededor di 2.400 indokumentado i refugiado ku no tabata den e posishon di haña akseso na provishonnan di kuido den e sistema ofisial i legal.

E klínika en kuestion a ofresé kuido primario, reproduktivo i prenatal i tambe kuido materno, pero na mes momentu tambe el a duna informashon i kuido kontra HIV i diabétis.

Adishonal na esei e staf dje klínika a risibí training pa duna servisio den kuadro dje pandemia di COVID-19.

Na Aruba e partnernan a ofresé pa duna konseho i informashon, konseho riba planiamentu di famia, repartishon di antikonseptivo i un hotline grátis na Spañó pa kasonan di COVID-19 i spesialmente pa refugiado i imigrantenan.

Partnernan den salubridat huntu ku Nashonnan Uní a kuminsá ku klínikanan mobil pa asina duna informashon i kuido reproduktivo. Tambe nan a bin ofresé fasilidatnan di medisina virtual. Esaki ta un proyekto ku a keda ehekutá den diferente pais i ku a ser risibí di un forma masha positivo.

Pero tin di rekonosé si ku, adishonalmente na e retonan ku tabatin kaba promé ku e pandemia di COVID-19, situashonnan manera lockdown i restrikshon den movementu a hasi e difikultatnan pa haña akseso na kuido mas grave, i solamente esaki a kontribuí na un subida den nesesidat.