WILLEMSTAD.- E gobièrnu di PAR, MAN i PIN durante e último kuater añanan aki a planta solamente miseria pa nos pueblo. Ekonomia lo bai atras ku 20%, debe nashonal a subi di 55% pa kasi 100%, desempleo a subi te na 35% i desempleo bou di hubentut ta kasi 50% i sin perspektiva.

Parlamentario pa MFK sr Charles Cooper ta bisa ku défisit riba presupuesto di 822 mion florin i défisit den nos fondonan sosial di kasi 900 mion florin. Alrededor di 50% di nos poblashon ta den pobresa i pa empeorá e situashon mas ainda, tarifanan pa servisionan i produktonan públiko manera GASOLIN, FLOW, SELIKOR etc., a bira kasi impagabel i e kalidat a empeorá.

IMF durante su último bishita na Kòrsou a emití un rapòrt fechá 22 di yanüari 2021, kaminda IMF a tuma nota di e mal maneho di e gobièrnu aktual i a atvertí gabinete Rhuggenaath ku si no bini un kambio den e maneho aki, e lo hiba e pais aki na un kolapso total.

E promé atvertensia di IMF ta ku e gobièrnu di PAR, MAN i PIN a hisa debe di pais di 55% den 2019, hib’e te na 100% di nos GDP den 2021. Espesialmente e manera ku Gobièrnu di Kòrsou kier atend’é ku e debakel di Giro pa IMF ta inkomprendibel. Gobièrnu ke pa pueblo di Kòrsou paga pa e mal maneho hibá den Girobank. Pa logra esaki gobièrnu di Kòrsou ke devaluá nos florin i fia 170 mion florin na Hulanda i pueblo di Kòrsou mester paga esaki bèk.

MFK ta di opinion ku ta sea Banko Sentral, ku no a hasi su trabou na drechi, mester apsorbé esaki òf esnan den Girobank ku a hiba un mal maneho i no pueblo di Kòrsou manera gabinete Rhuggenaath kier hasi.

E di dos atvertensia di IMF na Gabinete Rhuggenaath, segun parlamentario Cooper ta pa no introdusí e belasting nobo, esta ABB (Algemene Besteding Belasting) di e forma ku nan ke hasié. Esaki lo brua e pueblo i esaki lo baha kresementu di nos ekonomia. Debí ku e forma ku PAR MAN i PIN ke introdusí e ABB ta nada mas ku un subida di “Invoerrechten”. Pues kontrali na loke e gobièrnu aki ke laga pueblo kere ku lo bini kresementu ekonómiko, IMF ta atvertí ku introdukshon di ABB dor di gabinete Rhuggenaath lo no tin kresementu ekonómiko.

Si realmente ke trese un kambio den e rumbo desastroso ku e aktual gabinete ta hibando Kòrsou, dia 19 di mart próksimo pueblo di Kòrsou mester laga e rapòrt aki di IMF ta e guia pa bosnan no laga e gabinete Rhuggenaath keda na mando. MESTER BINI UN KAMBIO.