Echo ta ku AOV no ta yega pa biba fo’i dje

WILLEMSTAD.- Un dje puntonan ku pa basta tempu partido MAN i partikularmente e lider polítiko sr. Hensley Koeiman a boga p’e ta un penshun general di forma obligatorio. For di yüni di aña pasá sr. Koeiman a entregá un inisiativa di lei ku a bai pa Konseho Konsultativo (Raad van Advies) pa konseho. E promé minister ta deseá di tin un penshun general asina teniendo kuenta ku e penshun di behes (AOV) ku tin te awor no ta yega pa un persona por hiba un bida digno.
Den e inisiativa di lei e a bisa entre otro ku, for di un investigashon ku a tuma lugá na 2008 dor di un komishon spesial huntu ku CBS a bin un indikashon kla ku 1 di kada 2 trahadó no tin un penshun adishonal banda di e AOV. Na 2011 un kantidat di 68.763 hende tabatin un trabou i un entrada. Ta kalkulá ku tin un 18.000 trahadó ku ta afiliá na un fondo di penshun privá i tambe un kantidat no spesifiká ku tin un penshun a base di nan akuerdo kolektivo di trabou (CAO).
Pues ta kalkulá ku un 50% di e forsa laboral, pues kasi 30.000, ku ta sobra i ku no tin un penshun adishonal. Mas aleu e kantidat di ámtenar i otro trahadónan di e mesun status ku tin un areglo di penshun ta kalkulá na 20.000 persona. For di esaki por konkluí ku, promé ku introdukshon di un penshun general, 1 di kada 2 trahadó no tin un areglo di penshun.
T’asina ku esnan ku a entregá e inisiativa di lei aki ta di opinion ku n’e momentunan aki e AOV no ta sufisiente. A base di datonan demográfiko di Büró Sentral di Estadístika, e poblashon ku baha na 98.6% na aña 2030, miéntras ku e kantidat di hende riba 60 aña lo subi ku 25.7% den e periodo ei. Esaki ta nifiká un embeyesimentu di 26% riba un periodo di kasi 20 aña. Si hasi e pregunta, kiko lo t’e konsekuensianan pa e poblashon aki pa loke ta penshun, por konkluí ku e gastunan pa fondo di AOV a lo ménos lo bira dòbel den e próksimo 20 aña, miéntras ku e entradanan di prima lo no keda na e mesun nivel ei.
Un otro pregunta ta, si lo por sigui paga penshun di AOV, sigur si tene kuenta ku e tendensia di embeyesimentu, ademas si mester sigui informashonnan for di kuentanan anual di SVB.
No mester lubidá ku na 2013 a tuma algun medida, ku a enserá hisa e prima di 13% pa 15% i a hisa e “premieloongrens” di 93 mil pa 150 mil florin pa aña. E edat di penshun tambe a ser hisá te na 65 aña. Ku e adaptashonnan struktural aki e pago di penshun di behes lo ta garantisá pa algun aña mas i pa un periodo nesesario pa e Penshun Básiko Obligatorio alkansá su madures.