WILLEMSTAD.- Parlamentario sr. Jaime Cordoba ta haña ku mester bini ku un rekargo inkluí den e lei pa bienestar di animal ku ta generá entrada ku ta bai direktamente pa e fundashon kuido di bestia, Dierenbescherming. Segun Cordoba, mester strukturá esaki di tal manera ku niun parti dje plaka no ta pasa serka gobièrnu pa e no kita niun punta, e plaka mester bai shen porshento i direktamente pa e organisashon aki pa kuido di animal. Asina el a duna di konosé durante e debatenan di e siman aki riba e proyekto di lei pa bienestar di animal presentá pa frakshon di MAN.

Segun sr. Corcoba, e por kòrda te awe kon algun aña pasá a sali den notisia ku kachónan salbahe tabata ataká hende riba kaya etc. Den promé instante a pensa pa likidá kachónan ku ta kana lòs pa loko riba kaya, i esei a sosodé tambe. E kantidat di kachó riba kaya a bira demasiado.

Awor den e proyekto di lei aki ta bisa tambe ku lo alohá animalnan ku a ser hañá riba kaya serka Dierenasiel, i si despues di 4 dia ningun hende no reklamá nan, ku lo pone nan drumi.  E ta kere ku 4 dia ta tiki, aunke lo por diskutí largu riba dje pasobra tur e dianan di mas ei lo kosta e entidat na kuminda etc.

Pero segun Cordoba, ta p’esei e ta haña ku mester bini ku un rekargo/belasting ku tin di bai direktamente pa Dierenbescherming i Dierenasiel. E mester ta un rekargo ku ta bai direktamente pa e entidat aki. Pues tur sèn ku ser kobrá pa atendé ku bestia (belasting di kachó) tin di bai direktamente den man di e entidat ariba menshoná. No laga e plaka pasa den e mulina gubernamental, pasobra na kaminda lo kita un punta afó.

Segun Cordoba, e personal di Dierenbescherming ta hasiendo milager. Nos por mira komo ehèmpel kon e organisashonnan pa bienestar di animal ta traha, kon nan ta reskatá animalnan maltratá i neglishá. Nan ta duna tratamentu na e animalnan aki i nan ta rekuperá, i nan ta mustra esei tambe.

E ta kere ku e lei aki mester bini, no opstante ku por tabatin un tiki opheshon den kaminda. Tin un gran mayoria di hende riba nos isla ku ta kria kachó, òf a lo ménos tin un òf mas kachó den nan kurá. Pero tin un kantidat tambe ku ta maltratá animal.