MÒSKU, RUSIA, AFP.- Presidente ruso Vladimir Putin a anunsiá awe mardugá (ora di Oropa) un operashon militar na Ukrania, pa defendé e separatistanan den e pais aki. “Mi a tuma e desishon di un operashon militar”, asina Putin a deklará den un mensahe inesperá via televishon, poko promé ku 3 or di mardugá. Den e mensahe el a yama e militarnan ukraniano pa nan pone nan arma abou.

E situashon ta tenso. Putin di su parti a bisa ku esun ku interferí ku su operashon na Ukrania, lo konosé represaya di su parti.

E sekretario general di ONU Antonio Guteres a dirigí su mes direktamente na presidente ruso Vladimir Putin, for di e konseho di seguridat di ONU, pa bisé pa e para su trupanan ataka Ukrania, den kaso ku e operashon militar ta tuma lugá.

E athunto pa asuntunan polítiko Rosemary DiCarlo a bisa di tin informashon riba un siere di e espasio aéreo pa buelonan sivil di parti di Rusia serka di frontera ku Ukrania i ku e kolumnanan militar tabata dirigí nan mes pa Ukrania ounke e no a duna verifikashon di parti di ONU.

Den e mesun reunion di emergensia di Konseho di Seguridat, e di dos organisá den tres dia, e embahador merikano den Nashonnan Uni Linda Thomas Greenfield a pidi meskos na e presidente ruso. “Bira bo trupanan, tankinan, avionnan bek Rusia”, e diplomátiko a demanda. “Evitá e abismo promé ku ta demasiado lat”, asina el a agregá.

Cuba ta sosten Rusia

Cuba di otro banda a ofresé su sosten na Rusia, bisando ku Mòsku tin derechi di defendé su mes i OTAN mester atendé su demanda di garantia di seguridat mei mei di e konflikto ku Ukrania, durante un bishita ofisial di presidente di Duma, Viacheslav Volodin, na La Habana.

Presidente Miguel Diaz Canel a ekspresá su solidaridat ku Rusia den kuadro di e sanshonnan i ekspanshon di OTAN pa su frontera, asina televishon estatal a informá ku a mustra imágennan di e enkuentro den Palacio di la Revolucion.

Den un komunikado e kansier kubano a pidi Merka i OTAN pa nan kontesta di manera serio i realista na e damandanan di garantia di seguridat di Rusia i a bisa ku Mòsku tin derechi di defendé su mes.

Merka; Rusia ta responsabel

Presidente merikano Joe Biden a bisa ku mundu ta tene Rusia responsabel pa e atake riba Ukrania i ku lo sòru pa un pèrdida katastrófiko di bida.

Den un deklarashon poko despues ku presidente Ruso Vladimir Putin a anunsiá e operashon militar na Ukrania, Biden a bisa ku e lo dirigí su mes na públiko awe djaweps pa enfatisá riba e konsekuensianan pa Rusia.

https://extra.cw/imf-world-bank-chiefs-warn-of-global-impacts-from-ukraine-war/

https://extra.cw/world-stocks-plunge-oil-tops-105-as-russia-invades-ukraine/

https://extra.cw/desolacion-bombardeos-y-cadaveres-calcinados-en-el-este-de-ucrania/

https://extra.cw/urgent-european-wheat-prices-hit-record-high-after-ukraine-invasion/

https://extra.cw/rusia-inicia-la-invasion-de-ucrania/