WILLEMSTAD.-Informashon a drenta na mesa di redakshon di EXTRA ku e invershonista Jacob Gelt Dekker a fayesé. Gelt Dekker pa algun aña kaba ta sufriendo debí na malesa serio. Gelt Dekker a hasi invershon grandi na Kòrsou, e.o den loke ta konosí ketu bai komo Kura Hulanda Hotel i Kura Hulanda Museum. Despues a sigui Kura Hulanda Lodge na Westpunt. Ta algun hoya ku Kòrsou por ta hopi orguyoso i dje.

Algun tempu pasa Gelt Dekker mes a pone riba su página di Facebook ku dentro di algun dia e lo muri. El a splika e tempu ei ku e ta sufri di kanser i ku e ta bai kuminsá un kura speshal i den kaso ku e kura no duna resultado, ku e lo muri.

Den mesun rosea mester indiká ku e invershonista tabatin diskushon hopi fuerte ku polítikonan/gobernante di nos pais. Asta a yega asina leu ku tin polítiko ku a deklará Gelt Dekker persona non grata. Esaki ta a base di deklarashonnan hopi fuerte ku e invershonista tabata hasi den direkshon di gobièrnunan di turno i polítikonan engeneral. Pas na su alma.