Speransa ku pa fin febrüari tin klaridat

WILLEMSTAD.-Trahadónan di kontratista ku tabata traha riba tereno di refineria i COT na Bullenbaai ta hopi nèrvioso, na promé lugá pasobra nan no ta tin informashon kiko ta bai pasa ku e refineria. Sindikato SGTK ku ta representá e Trahadónan aki ta pendiente pasobra nan tambe ke mira ku kosnan ta kuminsá move. Na palabra Alcides Cova presidente di e sindikato SGTK den deklarashon na EXTRA.

Alcides Cova ta konvensí ku mester keda kla, pasobra aparte di e Trahadónan ta hinter komunidat ta pendiente i ansioso. SGTK a pidi kombersashon ku esnan konserní den e negosiashonnan. For di siman pasá a primintí ku lo regla un enkuentro pa pone e sindikato na altura.

EXTRA ta na altura invershonistanan for di Brasil i Colombia ta na Kòrsou pa e refineria. Den kombersashon ku sr. Cova el a duna di konosé ku e tambe a tuma nota di esei. SGTK tin speransa ku e desaroyonan lo ta positivo i p’esei mes nan ta kere ku pa fin di febrüari lo tin klaridat kiko ta bira futuro di e refineria.

SGTK ta boga tambe pa tanten ku negosiashonnan ta sigui pa esnan konserní por kuminsá duna enkargo na kontratistanan pa kuminsá limpia i prepará e plantanan. E invershonistanan ta kanando den refineria pa wak kua ta e plantanan ku ta bai kuminsá kuné den e promé fase, pues ta bon pa kuminsá ku e trabounan di mantenshon.