Toastmasters International a selebrá 97 aniversario e aña aki miéntras ku e klup aki na Kòrsou a selebrá 47 aña. Tur dos rumbo pa selebrashonnan grandi respektivamente 100 aña internashonal i 50 aña aki na Kòrsou. Nos a papia ku Nathaly Lobato-de Windt ku ta direktor di Divishon A distrito 81 di Toastmasters i el a konta su eksperensia i tambe e benefishinan di forma parti di e klup di Toastmasters.

22 klup i 400 miembro...

Nathaly ta den e klup Toastmaster BNA i despues e ta miembro tambe di 2 advance club ku ta Pioneers Advance Toastmasters Club i Leader Beyond Border. Ta dos klup avansá i konsekuentemente bo mester tin un nivel di e promé parti pa asina por forma parti di nan. E dos klupnan avansá ta papia ingles so. Na Kòrsou tin 22 klup en total i tin alrededor di 400 miembro na Kòrsou. Kòrsou ta e divishon A. Pa por drenta un klup di Toastmaster e úniko kos ku ta eksihí ta pa tin 18 aña di edat. No ta importá si bo ta studiante, si bo ta traha i nan tin miembro di riba 70 aña. Ta un variashon di edat ku esnan mas eksperensia i mas hóben. Den e klup di Toastmasters bo ta tira diskurso i kompartí bo historia. E hóben ta bin kompartí su historia i tambe tende di historia i eksperensia di esun mas grandi. Asina ta traspasá konosementu i eksperensia ku otro segun sra. Nathaly Lobato-de Windt a splika Djasabra.

Komuniká...

E klup di Toastmasters ta para pa desaroyo personal di un personal. Esun ku bira miembro ta disidí kon lihé e ke bai, kuantu proyekto e ke hasi den un luna. Ta reuní dos bia pa luna. I durante di reunion ta hasi presentashon di e proyekto. Bo ta traha tantu den e klup mes riba e parti gramátiko, kon ta usa idioma, si ta papiamentu mester papi’é bon, di ta ingles purba pa e ta bon. Tambe tin miembronan ku den e reunion ta paga tinu riba Em ku Am, ta e garotinan ku ora hende ta pensa e tin maña di bisa “Am” òf tin hende ta ripití kos. Asina ta mira ku ta traha riba e partinan di komunikashon. Mas aleu nan ta paga tinu riba tempu.  Tin un registradó di tempu ku na momentu di presentá proyekto kisas e mester ta 5 pa 7 minüt, bo ta keda guia pa keda den e tempu ei. E persona ei ta duna indikashon pa e miembro siña pa ta mas konsiso den trese mensahe. Eseinan ta kosnan ku durante di tur reunion nan ta siña. Tambe ta evaluá. Nathaly a splika ku hopi bia kaminda e hende ta traha e tin di evaluá òf bisa kolega algu. Esei tambe ta siña den Toastmasters. Ta trata riba e desaroyo personal ku por usa den profeshon pero tambe na kas. Komunikashon tin bia hende ta kere ku ta den públiko bo tin di para  i papia. Komunikashon ta dos hende tambe. Asina komunikashon ta kuminsá.

Skucha i apsorbá...

“Nos a ripará ku hende mas bien ta skucha pa kontestá i no ta skucha pa apsorbá loke bo ta bisando i pa despues por traha un kontesta. For di ora bo ta papiando ya nan ta pensa kiko ta bai kontestá. I di mes esei ta kosnan ku ta stroba e komunikashon i si bo ta komuniká bon ta mas fásil pa bo ta bon lider. Un bon liber mester por komuniká su mensahe, su metanan, ta un meta komun nos tin di logra prinsipalmente na trabou”, Nathaly a opservá. Por ehèmpel por haña na trabou departamentunan por tin kes kes ku otro òf koleganan ku kes kes ku otro i den grupo di Toastmasters bo ta siña asta kon dil ku konflikto. Si bo tin konflikto kon por yega na otro. E ta un variedat hopi amplio. Sky is the Limit segun Nathaly. Ta e hende ta disidí kon leu e ke bai den dje. E hende ta traha riba su mes desaroyo, un desaroyo personal pero konhuntamente komo klup i e ta influensiá komunidat tambe di forma positivo.

5 nivel diferente kaminda...

Komo miembro di e klup di Toastmaster, meskos ku otro organisashonnan manera di skout entre otro, nan ta kuminsá na sierto nivel. Serka nan tin e manera di edukashon Pathways di kual tin 11 Path esta kaminda pa skohe. Por ehèmpel e miembro por skohe pa siña kon ta plania inovativo òf e ke desaroyá su liderazgo, òf tambe pa bira un lider dinámiko. Tin tambe “presentation mastery” esta dominio kon ta presentá. Ta 11 diferente kaminda tin pa skohe i den nan tin 5 nivel tambe. Tin e promé nivel ku ta esun básiko kaminda ta siña e komunikashon básiko, nivel 2 ta mas e parti liderazgo i komunikashon, 3 ta bai mas avansá, 4 tambe mas avansá i asina ta yega nivel 5. E nivel 5 ta e máksimo ku ta yega riba e kaminda esta den e Path.

Guia spesífiko...

Asina e persona bira miembro di e klup di Toastmasters e ta haña un mentor, esaki ta e hende ku ta guia e miembro den su jornada di Toastmasters. E ta yuda tantu personal, kon e miembro  ta desaroyá i tambe e ta yuda ku proyektonan. No ta asina ku ta bira miembro i bo mes ta bai buska, pero bo ta haña guia i den e klup tambe tin vários hende ta guia. Tin pa guia spesífikamente pero tin mas ku ta yuda. E idea su tras ta pa yuda un amigu krese. Ta un ambiente di drenta komo miembro i sali komo famia. Den e trayektoria ei bo ta bira amigu, famia di otro i tin hende ta sinti unda nan ke yega, ku nan a logra i nan ta sigui ku otro pasó den nan bida. Si ke konosé hende di mas di 26 òf 30 aña miembro di Toastmasters ta interesante pa drenta e klup. Tin ta sinti ku nan a yega kaminda nan ke yega i tòg nan ta keda pa asina por yuda otronan.

Un siman di Toastmasters...

E klup di mas bieu na Kòrsou tin 47 aña i ta riba kaminda pa 50 aña miéntras esun internashonal ta bai kana yega 100 aña. Resientemente na Kòrsou a selebrá ku ta 2005 gezaghèber di e tempu ei sra. Lisa Dindial a proklamá un siman di Toastmasters. Dia 22 di òktober a selebrá e promé reunion Toastmasters dor di esun ku a funda e klup. Na Kòrsou na 2005 a bira e promé pais den mundu kompleto ku ta selebrá un siman largu di Toastmasters i ku un proklamashon dor di gobièrnu.

Invershon inmenso den e persona...

E úniko rekerimentu pa drenta e klup ta 18 aña i e persona mester ke traha na su mes. E tempu ta 2 ora pa reunion, un total di 4 luna den un luna. E ta tiki kompará ku e invershon den bo mes. I einan segun Nathaly ta yegando na hóbennan profeshonal i ke sa mas kon pa profilá i den esaki Toastmasters tambe ta yuda kuné. Nan ta keda aserka hopi pa hóbennan pero tambe esnan ku ta baha ku penshun i tin tempu. Si mira e benefishinan ku ta saka for di e miembresia, pa e preis ku ta paga ta nada (30 florin pa luna).  Dos bia pa aña ta paga miembresia na Toastmasters internashonal ku ta 45 dòler. Tin klupnan mas barata ku otro; kada klup tin nan tarifa i nan kontribushon ku nan ta pidi. Si pone nan huntu mes ainda no ta yega e sèn ku un Masterclass ta eksihí. E práktika ta masha importante. Tin hende ta kere ku liderato ta algu ku tin di hasi kontinuamente pero mundu ta kambia i awor ku tin Zoom i e posibilidat tei pa reuní ku algun miembro den persona i otro parti por hasi ‘online’. Esei tambe ta trese poko konfortabilidat pa ta den bo kas tira bo diskurso, hasi bo tarea i desaroyá bo mes. E variedat ta amplio i esei tambe ta atraé hende na Toastmasters.

Manehá kon ta usa tempu...

Hopi bia e faktor tempu ta loke ta pone e hende pensa promé djòin un ke otro klup. Nathaly Lobato-de Windt a bisa ku nan ta siña asta esei esta ‘time management’, manehá tempu. Nathaly ta kòrda ku su mama semper a bisa ku bo no por manehá tempu pero manehá kon ta usa e tempu. E tempu a keda i kon ta repartí i us’é ta importante. Ta e hende mester sa kuantu tempu e ta dediká i ta dispuesto na dediká. Tin hende tin kisas 5 ora so pa luna i esei e ta manehá.

Mama, tata i yu Toastmasters...

Nathaly mes tin solamente 4 aña den Toastmasters. Pero su kasá a forma parti di e klup mas di 25 aña komo Toastmasters. Nathaly a warda e yu krese pa asina e por forma parti di e klup. E ta kòrda ku e tabata huntu ku su kasá na kuminsamentu di e klup kaminda nan a kuminsá. For di prinsipio el a mira e benefishinan pero el a skohe pa keda kas ku e yu te ora e tin un edat pa e so por keda kas. I 4 aña pasá ora e yu tabata kabando su skol, el a disidí di djòin Toastmasters di forma ofisial. I nan yu tambe a bira miembro asina el a hasi 18 Toastmasters. E yu ta studiante na Inglatera i e ta siguiendo ku e reunionnan ‘online’. Ta trata aki di un famia Toastmasters.

Benefishinan internashonal...

Nathaly a splika e benefishinan di ta miembro di e organisashon internashonal. El a bisa ku nan ta miembro internashonal pero e base na Kòrsou. Esei ta nifiká ku internashonal nan ta kontinuamente desaroyando ‘Path’ nan nobo i e echo ku tin akseso na diferente informashon. Bo ta subi Toastmasters.org i un mundu ta habri pa bo.  Nathaly a bisa ku dia el a kaba di kuminsá, despues di 1 aña e tabatin mester di un mentor i el a haña unu na Inglatera. Un señora na London tabata buska un persona pa e ta su mentor i asina nan dos a klek ku otro i nan a bira mentor i menti di otro. Despues di e temporada ofisial di mentor, nan a sigui i nan a keda ku un amistat. Mundu a bira chikí, bo tin akseso na diferente otro organisashon, por yega na otro klup, otro miembro. “Henter mundu di Toastmasters ta na bo alkanse”, Nathaly a bisa.

Oportunidat...

Nathaly ta kere ku mester hasi mihó uso di e oportunidat ku  e klupnan di Toastmasters ta ofresé. E ta importante pa komo hende i persona bo ta krese. No solamente riba e parti di ta un lider pero komunikando bo ta bira mihó persona. Ki dushi ta pa komuniká i konektá ku otro, komprondé otro. Toastmasters ta guia e persona pa e mehorá su abilidat. ‘Bo kompetensia no ta e hende pafó pero bo kompetensia ta abo di ayera pasobra tur dia bo mester bira un tiki mas mihó. I esei nos ta traha pe pa bai dilanti i Toastmasters por yuda den esaki”. Pa drenta den e klup por subi e wèpsait di Toastmasters.org i einan tin Find a Club. Einan ta haña tur klup na Kòrsou i por skohe kua pa forma parti di dje. Por skohe a base di e dia ku nan ta reuní. ‘Si tin hende ke aserká mi, mi ta disponibel na 5122791 òf Facebook  Division A i D81’.

Funda...

 Ralph C. Smedley a funda Toastmasters. El a kana vários aña ku e idea di lanta un klup ku su meta ta pa yuda personanan desaroyá nan mes komo oradó i lider. E idea aki a nase despues ku el a kuminsá traha na YMCA (Young Men Cristian Organisation) despues di a kaba universidat mirando e echo ku vários hende rondó di dje tabatin e problema pa por papia den públiko i ta lider sea na trabou òf den un organisashon. Despues di a hasi algun intento pa lanta un klup ofisialmente el a lanta su promé klup dia 22 di òktober 1924, na Santa Ana, California, na Estádos Unídos. E promé klup di Toastmasters na Kòrsou, Simadan Toastmasters Club, a wòrdu fundá dia 29 di aprel 1974, e aña aki e klup a kumpli e edat respetá di 47.