WILLEMSTAD.- Djárason korte di promé instansia a bolbe posponé e kaso di dòbel asesinato ku a tuma lugá aña pasá dia 9 di febrüari riba Koraalspechtweg, kaminda dos persona a pèrdè nan bida. E kaso a keda posponé pa motibu ku despues di kasi 2 aña di e suseso, ainda e investigashonnan no ta kla. Na prinsipio ministerio Públiko a akusá e hòmbernan Shaquille de Lanoy (22) nasé na Kòrsou i Renny Ocando Curiel (26) nasé na Venezuela, di a tira Signald Dionisio Richart Quammie, nasé na Kòrsou dia 27 di aprel 2001 i Regulo Jose Gomez-Hermoso, nasé na Venezuela dia 26 òktober 1984, mata.
Durante un kaso ku e keda tratá den pro forma anteriormente, abogado mr Marije Vaders, a logra konvensé hues pa suspendé detenshon di Shaquille mirando ku no tin prueba di loke nan ta akus’é di dje.
Fiskal Hato- Willems a bai di akuerdo i a bari e akusashon di asesinato pa Shaquille fo’i riba mesa. Pero si e lo keda persiguí pa poseshon di arma kandela.
Fiskal a bisa ku testigunan a papia di otro dos persona ku lo ta esnan ku a tira. Relashoná ku esaki, algun luna pasá a dagfar e hòmbernan Ingabriel “Gabi” Alberto i Thaino Mathilda den e kaso aki komo sospechosonan prinsipal. Alberto a kaba di risibí kondena di 20 aña pa e kaso di asesinato ku a tuma lugá na altura Libanesa dia 2 di sèptèmber 2019.
Mathilda ta sintando kastigu pa un kaso di atrako brutal ku a sosodé dia 31 desèmber 2017, na pòmp di gasolin Vanddis na Weg naar Fuik kaminda malechornan a kibra e ofisina di e pòmp ku un kran i bai ku e kaha di plaka.
Den e kaso ei Mathilda a keda kondená pa atrako brutal, intento di asesinato i robo.
Pa loke ta trata e ko akusado Renny Ocando Curiel (26) si tin sospecho den su kontra, mirando ku e “handschiet tèst” ku a hasi kuné, a sali positivo. Curiel semper a para riba ku e no tin nada di aber ku e kaso i ta inosente.
Ayera durante e kaso ku a bolbe presentá den pro forma, su abogado a hasi petishon pa suspendé su detenshon, mirando ku ta bai hasi 2 aña ku ainda e kaso no por wòrdu trata integralmente. Hues Edelenbos despues di a bai deliberá, a rechasá e petishon pa motibu ku e akusashon den Curiel su kontra ta pisa mas i ta basta grave.
Riba e dia en kuestion aparentemente tabatin un negoshashon òf interkambio di arma ku a bai kompletamente robes i a kaba den dòbel asesinato.
Shaquille ku ta amigu ku e víktima Richart i tabata huntu kuné e dia ei, a bisa ku e mes tabata víktima, despues ku nan a agredié malamente i lag’é keda ku kap basta grandi na su wowo i pone ku el a pèrdè konosementu.
Ora ku el a lanta, el a haña e víktimanan morto i ya ambulans tabata na e sitio. E akusado a bisa ku e ta inosente i ta imposibel ku si el a kometé algu e mes ta bai buska yudansa di polis.
Mirando ku ainda falta algun detaye den e investigashon e kaso a keda posponé pa dia 19 di febrüari 2021.