Wardakosta Kòrsou ta konfirmá ku tin barku pèrdí riba laman

WILLEMSTAD.- Outoridatnan venezolano a kuminsá un investigashon profundo riba desaparishon di un barku for di e flota di wardakosta di Venezuela. Outoridatnan venezolano no ta dunando muchu informashon pero agensianan di notisia ku tin bon kontakto den e pais ta informando ku e barku di wardakosta tin algun dia kaba ku niun hende no sa di dje.

E promé informashon ta ku e barku lo a pèrdè for di radar den dianan di Pasku. EXTRA mester indiká ku awendia ta praktikamente imposibel pa un barku di e magnitut ei ‘pèrdè’. Por sigui tur paso di tur barku 24 ora pa dia rònt mundu, esei segun sistemanan sofistiká ku ta eksistí. Den kaso ku un barku hañ’e ku problema riba laman e ta pidi ousilio segun un sistema yamá EPIRB (emergency position indication radio beacon) òf SART. Eseinan ta “distress alarm” ku ta pone ku mundu marítimo internashonalmente ta haña sa ku tin un barku den problema i esnan ku ta den e área spesífiko ta paga mas tinu pa wak si nan a topa kualke situashon.

Un posibilidat ta ku e kapitan di e barku lo por a paga e sistema “AIS transponder”, via di e sistema ei ta sigui e barku unda ku e ta rònt mundu. Den kaso ku paga e sistema ei ta bira imposibel pa wak ki direkshon e barku a kue. Lo por mira e barku riba radar pero esei ta solamente barkunan ku ta den besindario di e barku lo por mir’e riba radar. Esaki sigur ta hala atenshon mirando ku for di sentro di gobernashon venezolano ta tene kuenta ku kisas e kapitan i su tripulashon lo por ta buskando manera pa hui di e régimen militar i bai buska refugio den otro pais.

Tin e pensamentu ku e barku lo por a senk, ounke esaki ta hopi inprobabel. Manera indiká ariba tur barku mester tin e EPIRB (emergency position indication radio beacon). Na e momentu ku e barku senk i e ekipo aki mishi ku awa mesora e ta manda señal pa mundu marítimo rònt mundu.

DCIM100MEDIADJI_0002.JPG

EXTRA a chek i no tin tal anunsio. EXTRA a chek ku sra. Clement, e bosero nobis nobis di wardakosta kende a splika ku e teritorio di laman unda e barku lo mester a ‘pèrdè’ ta kai bou di responsabilidat di Puerto Rico, San Juan. Wardakosta di San Juan a bai tira patruya den e área pero te ainda no a logra lokalisá e barku di wardakosta venezolano ni su tripulashon. Di e forma aki wardakosta di Kòrsou ta konfirmá ku e barku di wardakosta venezolano i su tripulashon ta pèrdí pa algun dia kaba riba laman.