WILLEMSTAD.- E kaso di asesinato ku a haña e nòmber “Whisper”, un bia mas a keda posponé ayera.
Ta trata di e kaso kaminda e víktima Dylmer Dielingen, nasé na Kòrsou dia 25 di desèmber 1983, a pèrdè su bida, despues di a haña 7 hinká rònt su kurpa dia 22 di mei 2020 na un snèk riba Piscaderaweg.
Pa ku e kaso aki, e hòmber Luis Duharte Rodriguez (32) nasé na Cuba, ta keda akusá di a kometé e akto, huntu ku un otro hòmber ku e no ke divulgá su nòmber i ta bisa ku e no sa ta ken.
Luis semper a para riba ku e no ta esun ku a hinka e víktima.
Segun fiskal Hato –Willems ainda no por trata e kaso pasó polisnan ketu bai ta hasiendo mas investigashon, entre otro di un otro sospechoso.
Segun hues de Kort via un tep anónimo, un informante a bisa ku el a mira potrèt di un hòmber riba Facebook ku nan ta akusá di ta esun ku a hinka e víktima e dia ei na e snèk riba Piscaderaweg.
El a bisa ku e tabata testigu i a mira e hinkamentu pero e tabatin miedu i a kore bai.
Segun e informante esun ku a hinka e persona ku un kuchú, ta un hende di mas o ménos 1 meter 80, un tiki gordo, koló brùin skur i tabatin djins bistí.
El a sigui bisa ku e sospechoso no ta yu’i Kòrsou, pasó e ta papia ku aksènt spañó. El a insistí ku e persona riba Facebook no ta esun ku a hinka e víktima ku kuchú.
Mas aleu el a sigui bisa ku doño di e snèk sa presis ken tabata e outor di e krímen, pasó el a mira tur kos.
Hues a puntra fiskal si e potrèt di e akusado tabata riba Facebook, fiskal a bisa ku e informashon ei a drenta fo’i aña pasá, pero ta e siman aki polis a hañ’é. Pues ta esei nan ta bai investigá. Duharte tin kabei rasta i postura delegá.
Segun un otro testigu, un tal Ramon, a bis’é ku e rasta ta un di esnan ku a hinka e víktima.
Pareha di e víktima resientemente a deklará na polis i a bisa ku e dia ei, el a mira kon un hòmber mas yen, ku kuchú den man i tambe e akusado a kore tras di e víktima.
Ora polis a puntr’é ken a hinka e víktima, el a bisa ku el a mira e hòmber gordo ku kuchú, pero no por a mira si e rasta tabatin un kuchú den su man òf otro opheto, pero si e tabata hopi serka di e víktima. Nan tur dos a kore bai su tras.
Segun pareha di e víktima mas aleu, e rasta i e otro hòmber tabata e úniko nan ku a kore bai tras di e víktima ku despues a resultá di tabatin 7 hinká ku dos diferente arma.
E rapòrt di patólogo ta bisa ku e armanan ku a keda usá tabata probablemente kuchú i skrufdrai.
Segun pareha di e víktima, e akusado no por gaña bisa ku e no tin nada di aber ku e morto, pasó el a mir’é kore bai tras di e víktima despues di e diskushon.
Segun e pareha no tabatin niun otro hende mas pará serka di e víktima.