WILLEMSTAD.- E revista di salú di Ulanda a realisá un investigashon di salubridat dentro di Reino. A kompará esakinan ku paisnan di den Wèst i nan paisnan ku nan ta “goberná” den área di Karibe. E paisnan ku a hasi e investigashon ta Ulanda, Fransia, Merka i Inglatera. E paisnan aki tin islanan den área di Karibe.
A hasi investigashon di motibunan di fayesimentu den e periodo di 1980 pa 2014.
Pa Kòrsou ta konta ku den e periodo di 1980 pa 2014 tabatin un bahada di espektativa di bida pa e hende hòmber i un stagnashon di esaki pa hende muhé. Tendensia den espektativa di bida den periodo di 1980 pa 2014 tabata desfaborabel pa e islanan di Karibe Ulandes, ku relativamente tin un grado haltu di outonomia.
E ekspektativa di bida na Ulanda ta mas haltu i e kantidat di hende ku a fayesé, ta mas abou ku e dos islanan di Karibe Ulandes mas grandi ku ta Aruba i Kòrsou. Aklarashon p’esaki ta e área regional ku e islanan ta situá i tambe e forma kon e hendenan ta biba.
A hasi investigashon riba malesanan króniko. Riba e islanan Karibe Ulandes, e kantidat di mortonan di kurason i di arteria tin un mehorashon minimal. Na Kòrsou e kantidat di mortonan a subi den kasonan di kurason i di arteria. Tambe investigashon hasí a indiká ku e kantidat di mortonan den tráfiko tambe a hunga un ròl importante ku a bin aserka riba e kantidat di mortonan. Na Kòrsou i Aruba no tabatin un mehorashon supstansial di morto di kurason òf malesanan di arteria.
Den un enkuesta resientemente di salú na Kòrsou, a konstatá ku e kòntròl riba diabétis mellitus i preshon di kurpa ta hopi abou. Bou di esnan ku a hasi investigashon entre 32 pa 35% no tabatin un desviashon den nan sanger.
Finalmente e investigashon ta bisa ku e komunidat di e islanan Karibe Ulandes no a benefisiá di e adelanto ku tabatin último dékada den prevenshon i tratamentu di malesa di kurason i arteria.