WILLEMSTAD.- Tal manera EXTRA a informá den nos edishon di awe mainta, a surgi un situashon di preokupashon den RdK. Un informe ku EXTRA a kaba di risibí ta indiká ku e Hunta di Komisario di Refineria di Kòrsou N.V. (RdK) a pidi e direktor statutario di e kompania, sr. van Kwartel i otro empleado, dia 14 di novèmber pa tuma fakansi obligatorio. Un investigashon interno den kuadro di e proseso pa yega na un manehadó i operadó nobo pa nos refineria, tabata e rason pa pidi e direktor pa tuma fakansi.

Hunta di Komisario a tuma nota di  akusashonnan di terser, den kuadro di e proseso di solisitashon pa maneho i operashon di nos refineria. Hunta di Komisario a pidi aklarashon di e direktor, ku entretantu ta ku vakashon, tokante di e asuntu i na mes momentu a start un investigashon interno.

Hunta di Komisario a haña presentashon di e investigadónan den kua ta sali na kla ku sr. van Kwartel a duna deklarashon kontradiktorio durante di e investigashonnan.

E investigadónan sinembargo ainda no por a konkluí ku sr. van Kwartel no tabata envolví di un òf otro forma. Mas investigashon ta nesesario pa duna un bista kla di e ròl di e direktor, ku sea ta konfirmá e alegashonnan òf klara su nòmber. E presidente di Hunta di Komisario huntu ku gobièrnu, konforme loke ta usual den e tipo di kasonan aki, a notifiká Ministerio Públiko si i a duna deklarashon.

Chonky de Lannoy

Hunta di Komisario a opta i a disidí, pa pendiente e investigashon i pa prevení intervenshon no apropiá, pa duna e direktor fakansi na bienestar di e investigashon. Hunta di Komisario lo apuntá ir. Marcelino de Lannoy temporalmente ku maneho di e kompania. Hunta di Komisario lo hasi lo máksimo pa pèrkurá ku e trabounan regular di RdK (inkluso CRU) i e proseso di lisitashon (bidding) no keda afektá pa e desaroyo aki i lo vigilá ku e proseso ta sigui kana ordená i na un forma transparente. Hunta di Komisario no ke kore ningun rísiko ku e proseso aki ta keda strobá di un òf otro forma.