WILLEMSTAD.- Djárason 8 di mart 2017, den oranan di mainta polis a detené kuater sospechoso relashoná ku un ladronisia ku violensia ku a tuma lugá 8 di febrüari 2017 na Kaya Sagaria.

Riba e dia en kuestion dos hòmber deskonosí a drenta e kas na Kaya Sagaria i bou di menasa ku kuchú a kue diferente artíkulo i bai na pia for di e sitio.

Alrededor di 05.10 or, polis a hasi un entrada hudisial den un kas na Kaya Dodo Palm. Durante investigashon den e kas polis a haña i konfiská diferente artíkulo prosedente di e ladronisia ku violensia ariba menshoná.

A detené na e sitio dos sospechoso di sekso femenino i un maskulino:

• 
  

• J.S.H. di 24 aña di edat

• 
  

• S.A.H. di 21 aña di edat

• 
  

• J.N.H. di 19 aña di edat sekso maskulino, tur tres nasé na Kòrsou.

• 
  

Kontinuando ku e investigashon alrededor 07.15 or na altura di un skol na Noord Roosendaal a detené e hòmber E.H.J.T.M. nasé na Kòrsou di 29 aña di edat relashoná ku e ladronisia ku violensia ariba menshoná

A presentá tur e sospechoso dilanti un fiskal ouksiliar ku a ordená nan enkarselamentu pendiente mas investigashon.