WILLEMSTAD.- Ainda outoridatnan ta investigando kousa di e kandela feros ku a destruí Wah Sang Minimarket na Hoenderberg. Un kandela feros ku a kaba por kompleto ku e negoshi aki.

Ayera mainta reshèrshinan i TOD a bai na e sitio pa kuminsá ku e investigashon.

Tabata un situashon doloroso pa mira un kandela lanta i desaroyá rápidamente pa kaba ku Wah Sang asina lihé. E propietarionan kasi no a logra saka nada pasobra den un fregá di wowo e kandela a poderá di e negoshi kompleto.

E kandela a kuminsá segun polis den kareda di mitar di 11 di djaweps anochi i te ku ayera ainda huma tabata sali. Ayera ainda bomberonan a keda na e sitio pa kualke eventualidat i si e kandela lanta bèk.

E kandela aki aparte di a destruí e minimarket por kompletu, tambe a kima un kantor di number i kousa daño na un kas djis pegá.

A sera e tereno kompletu ku hèki te ku próksimo aviso. Posiblemente ta na momentu ku investigashonnan terminá, lo duna loke a sobra di e edifisio bèk na su doñonan.