WILLEMSTAD.- Un aña pasá Fundashon Prevenshon a agregá e investigashon den poblashon (screening) pa kanser na tripa na su pakete di investigashonnan den pueblo. Apesar di e aña pekuliar pa motibu di COVID-19, e promé resultadonan a sali eksitoso. Asina a sali na kla djabièrnè durante e fundashon su konferensia di prensa na kua okashon a habri tambe e sentro nobis-nobis di kolonoskopia (listramentu di tripa).
Kanser na tripa ta e forma di kanser mas frekuente serka hende hòmber i hende muhé na Kòrsou. Segun kálkulonan 1 riba kada 20 persona ta haña kanser na tripa i pa aña 50 pa 55 hende ta muri di dje. Meta di e screening ta pa prevení kanser na tripa i kaminda e malesa t’ei kaba pa detektá esei na un fase mas tempran posibel, di moda ku tratamentu ta posibel i ménos drástiko. Asina riba término e kantidat di kasonan mester baha i konsekuentemente tambe e kantidat di kasonan mortal.

Resultadonan di investigashon
Mientrastantu a saka mas ku 15 mil invitashon i alrededor di 150 hende a haña un kolonoskopia den nos sentro. “Despues di a buska e ‘testkit’ grátis na laboratorio, fásilmente mi por a hasi e tèst na kas; mi ta kontentu di a partisipá na e investigashon i aki dos aña lo mi partisipá atrobe sigur!”, segun un partisipante na e screening. Loke ta remarkabel na e resultadonan di e investigashon ta na un banda ku mas tantu hende muhé ta disidí pa partisipá na e investigashon den pueblo, pero na e otro banda tambe ku mas tantu hende hòmber ku hende muhé despues tin un tèst positivo i pues ku nan mester hasi un investigashon mas avansá.

Sentro di kolonoskopia
Den un siklo di kada tres luna ta saka 3000 invitashon pa partisipá na e screening. A base di e resultadonan di tèst ta rekerí seguidamente serka alrededor di 5% di e partisipantenan un kolonoskopia. Despues di un kombersashon di atmishon ku un médiko, esaki ta tuma lugá den e sentro ‘state of the art’ di kolonoskopia di Fundashon Prevenshon na Molenplein den Otrobanda, bou di guia di e spesialista MDL Michiel van Haastert for di Hulanda.
Presidente i ko-fundador di Fundashon Prevenshon Prof. Dr. H.M. ‘Bob’ Pinedo ta sumamente orguyoso ku e di tres programa di screening aki i e ta gradisí kada ken ku a yuda pa su realisashon.

PORTRET
...Profesor Bob Pinedo, presidente di Fundashon Prevenshon Dr. Michiel van Haastert, spesialista di tripa i supervisor di e proyekto na Kòrsou, den e sentro nobo di kolonoskopia di Fundashon Prevenshon na Molenplein den Otrobanda...