WILLEMSTAD – Un biaha mas Kòrsou ta konfrontá otro kaso trágiko di un víktima ku a fayesé pa motibu di un kas na kandela alrededor di 11or ayera anochi . Investigashonnan preliminar ta indiká ku ta eksistí e posibilidat grandi ku un fèn den un kamber a kue un korto sirkuito. Esaki a kousa un kandela den e kamber di e kas na Seru Grandi den bario di Fuik. E víktima a bin fayesé no pa motibu di e kandela pero pa inhalá demasiado huma. Den e kas tabatin dos persona, un mama i un yu. E yu hòmber apesar ku a logra sake for di e kas a bin fayesé. Un primu a sake for di kas i a kuminsá reanim’é. Ambulans a tuma over pero víktima a fayesé ya ku a inhalá basta huma. Indikashon ta ku e víktima tabatin alrededor di 25 aña di edat.E kas mes no a haña hopi daño pero den e kamber si. E mama ku tabata den e kas tambe a keda trata pero no mester a bai poli. Dokter di polis a yega na e sitio pa konstatá e morto. TDO i TFO i patólogo tur a yega tambe a yega pa hasi nan investigashon. Manera a indiká e investigashon ta konsentrá riba e fèn di e kamber. A konstatá ku e kamber tabata hopi kayente tambe.