E biaha aki na Repúblika Dominikana

WILLEMSTAD.- E komishon di Tráfiko, Transporte Públiko i Planifikashon Urbano di parlamento a haña otro invitashon pa un biahe di trabou pa tuma nota di proyekto di desaroyo urbano inspirá pa e modelo kolombiano “Mi Casa Ya”. Despues di a bishitá Colombia pa tuma nota di e produkto “Mi Casa Ya” awor Fundashon Kas Popular (FKP) ta invitá miembronan di e komishon pa un biahe pa Repúblika Dominikana pa bishitá e proyekto “Ciudad Juan Bosch”.

Segun direktor di FKP, Arthur Con ta skibi den su karta di invitashon, e proyekto ta ofresé kasnan pagabel na mas ku 5 mil famia i ta enserá un kantidat grandi di servisio manera skolnan, hospitalnan, áreanan di rekreashon i servisionan komersial. “E siudat ta un ehèmpel di desaroyo urbano duradero ku un enfoke fuerte riba uso efisiente di energia i kresementu sosial inklusivo”, Con ta bisa.

E direktor ta sigui bisa ku “Ciudad Juan Bosch” ta un koperashon entre sektor privá i sektor públiko, inspirá pa e modelo di bibienda kolombiano, “Mi Casa Ya” desaroyá pa Luis Felipe Henao i ku ta base pa desaroyo di bibienda urbano na diferente pais manera Repúblika Dominikana.

Durante di e bishita di trabou ku ta tuma lugá di 8 òktober pa 2 novèmber e miembronan di e komishon fiho di parlamento lo papia ku diferente instansia manera e outoridat máksimo di bibienda popular di Repúblika Dominikana i nan partnernan, pa asina haña un bista riba implementashon di e modelo inovativo aki, Con ta sigui bisa. “E bishita ta duna alabes e oportunidat pa siña for di e integrashon sosial ekonómiko i faktornan tékniko di medio ambiente den diseño i maneho di áreanan urbano.”

Ultimo biaha ku e komishon fiho a haña un invitashon pa bishitá Colombia a surgi un diskushon fuerte a base di e echo ku presidente di e komishon, Juniel Carolina (MFK) a presentá ku un proposishon den parlamento pa nombra Corine Djaoen-Genaro, e tempu ei ainda parlamentario pa PNP, hefe di delegashon pa asina e tambe por a biaha pa Colombia. Djaoen-Genaro a biaha alabes ku e komishon pa un biahe di trabou djis despues pa Inter Expo pa Hulanda riba invitashon di minister Charles Cooper ((MFK).

Nombramentu di Djaoen-Genaro tabata algu nobo i a kousa bastante komentario den komunidat kaminda ya kaba tin hopi reklamo riba gastunan haltu di biahe di parlamento.