WILLEMSTAD.- Organisashon internashonal pa migrashon IOM lo sigui yuda hende indokumentá na Kòrsou. Asina kordinadó di programa di IOM Joeri Arion a splika EXTRA djárason. 'Komo IOM na e momentu aki nos ta duna hende sin papel – hende indokumentá - yudansa di kuminda i tambe karchi pa kumpra kuminda.’ IOM ta hasi esaki for di momentu ku Krus Kòrá a stòp den luna di mei di e aña aki. Gobièrnu hulandes ta duna sèn pa IOM por sigui ku e trayekto ku Krus Kòrá a kuminsá for di momentu ku krísis di COVID-19 a kuminsá.
Ministerio di Desaroyo Sosial, Labor i Bienestar (SOAW) a tuma over yudansa pa duna abitantenan di Kòrsou, ku tiki entrada, yudansa di kuminda i karchi pa kumpra kuminda. IOM ta hasi esaki pa hende indokumentá. Ta intenshon di Hulanda ku for di promé di òktober Ministerio di SOAW tambe lo tuma over e yudansa pa hende indokumentá. Segun Arion te ainda no ta kla ki dia Ministerio di SOAW lo tuma over yudansa pa hende sin papel. Pero te ainda ministerio hulandes di Relashon Interno i Relashonnan di Reino ta duna sèn na IOM pa yuda hende sin papel. Komo agensia IOM tin aliansa ku Nashonnan Uní.
‘Nos komo IOM ta sigui duna yudansa, ku pa nos ta e kos mas esensial.’ Segun Arion na e momentu aki IOM ta duna yudansa na un kantidat di mas o ménos 4500 hende indokumentá ku tin hopi nesesidat. ‘‘Nos tin e kontaktonan i nos lo sigui duna e yudansa.’’ Segun Arion e kantidat di hende ku ta bin na remarke pa yudansa di kuminda ta varia. Algun luna pasa a papia tokante un kantidat entre 5.000 i 6.000 hende indokumentá ku tabata den nesesidat i a haña yudansa di kuminda. Arion ta splika ku e ta yuda tur miembro di famia. ‘Nos ta duna e yudansa na e kabes di famia. Pero e yudansa ta bai pa tur miembro di famia.’ Awor e kantidat a baha te mas o ménos 4.500 persona. Esaki tin di aber, entre otro, ku e echo ku gobièrnu a kita e ‘lockdown’ i komo konsekuensia mas hende a haña trabou atrobe. Tambe e tin di aber ku un grupo di hende indokumentá ku a sali for di Kòrsou den e último periodo.