Ryan ‘QD’ Navarro produktor lokal kosechando éksito internashonal

WILLEMSTAD.- ‘Dream Girl Global Remix’ ta e produkshon nobo di Ir-Sais ku ta keda lansá awe ku kolaborashon di Sean Paul i Davido, e Rei di Afrika. Lo e ta otro produkshon di Ir-Sais ku tin tur ingrediente pa bira otro éksito internashonal.

Na ingles tin un dicho ‘Never change a winning team’ i den e kaso aki ta presis loke ta tumando lugá. Ir-Sais ta bolbe uni ku e produktor lokal di videoclip, Ryan ‘QD’ Navarro pa produsí otro tremendo videoclip.

Pa QD, kende a kuminsá produsí videoclip for di 2009 i ku tin entre 150 pa 200 videoclip produsí, e ta un honor pa traha riba un produkshon asina huntu ku artista lokal di nos hermana isla Bonaire.

Ir-Sais ta sigui kosecha éksitonan internashonal si bo djis chèk i tuma nota ku e tin 4 produkshon ku a bula ‘million views’, ‘Nada un ta pasando’ – 3.2 mion views, ‘Dreamgirl Remix ku Rauw Alejandro’ ku a surpasá 160 mion views, ‘Dreamgirl Remix Brazil ku Tati Zaqui’ – 1.5 mion views i ‘Para’ huntu ku Gianluca Vacchi ku a surpasá 2 mion views.

Pa e produkshon dje último videoclip aki QD a traha ku mas hende lokal. A tene un oudishon pa duna mas hende lokal e chèns pa partisipá den un video musikal internashonal. QD semper a kere den promové nos talentonan lokal.

“ Pa grabashon di e videoclip nos a traha un ‘setup from scratch’. Esei ke men traha un "Bar" ku no ta eksistí pa nos a graba aden. Pa loke ta trata e grabashonnan di ‘green screen’ pa tantu Sean Paul komo Davido mi a dirigí esakinan via Zoom Call i WhatsApp. Despues tur esenanan di nan a wòrdu trahá den kòmpiuter kaminda nos a hinka tur modelo di Kòrsou huntu ku nan”, asina QD a splika.

SATISFECHO

“ E tabata un eksperensia otro pasobra tur kos mester a bai digital i mi mester a dirigí e grabashonnan via ‘conference’ di Zoom i WhatsApp. Pero e tabata un sintimentu great pasobra mi a lanta ta wak vooral Sean Paul na BET . Ke men e ta un sintimentu sumamente satisfaktorio di a haña e oportunidat di traha ku tantu Sean Paul komo Davido”.

Ir-Sais huntu ku QD Navarro, dos talento lokal ku ta sigui marka pouta riba mapa internashonal.

QD NAVARRO - … Ryan ‘QD’ Navarro