WILLEMSTAD.- Manera EXTRA a publiká den nos edishon di ayera, gerensia di PSB ta konfirmá iregularidat ku sistema di Pagafasil. Ta menshoná un suma di 900 mil florin.

Gerensia di PSB Bank resientemente a deskubrí sierto iregularidat ku e sistema di Pagafasil. Esaki a kondusí na un investigashon i pa por kontinuá ku esaki, a suspendé algun empleado. E investigashon no tin ningun influensia riba stabilidat di e banko. Ounke ku e sistema di Pagafasil semper tabata i lo sigui ta seif pa hasi uso di dje, ta hasiendo e ahustenan nesesario pa den futuro garantisá un nivel mas haltu di kontròl interno. Miéntras tantu, por sigui hasi uso di Pagafasil.

E iregularidat deskubrí ta enserá un montante di alrededor di nuebeshen mil florin (ANG 900.000). Ounke ta trata di un montante konsiderabel, di ningun manera e iregularidat aki ta afektá solides di e banko. PSB Bank, promé ku a identifiká e iregularidat aki, ya kaba tabata tumando e pasonan nesesario pa “upgrade” e sistema riba kua Pagafasil ta funshoná. Esaki ku e meta pa duna mihó servisio i pa garantisá mihó kòntròl interno di e prosesonan mará na uso di Pagafasil.

Motibu di e suspenshonnan ta pa duna espasio pa terminá e investigashon. Tambe ta importante pa klarifiká ku no ta sospechá tur e empleadonan suspendé di embolbimentu direkto den e iregularidat. Pa no influensiá e investigashon ni tacha privasidat di e empleadonan enbolbí, gerensia di PSB Bank lo no duna mas informashon den e fase aki.