WILLEMSTAD.- Isla di Yerba na Spaanse Water ta na benta internashonalmente. Un kompania di makelar ulandes ta enkargá ku e benta remarkabel aki. Nan no ta bisa kuantu nan ta pidi pa e isla pero ta pidi esnan interesá pa tuma kontakto direkto ku nan. E kompania ku ta intermediá yama Honders/Alting.

E kompania ta propagá e isla komo un isla privá pa kualke hende (ku plaka) biba manera ta e kaso ku e vishonario ingles Richard Branson ku ta biba riba un isla privá den Caribe.

E promotornan di e benta ta papia di un área sin habitante i úniko di Kòrsou. Den nan promoshon nan ta bisa ku ta trata di e último isla den reino ulandes kaminda ainda por konstruí. Nan ta menshoná tambe e awanan blou kristalino di Spaanse Water. Nan ta usa e palabranan mas bunita posibel pa indiká ku ta trata di un di e lokalidatnan  mas bunita ku a sobra den Reino Ulandes.

Nan ta bisa mas aleu  ku e isla aki ta e úniko isla kaminda por traha un "palasio" i kaminda un hende por gosa den trankilidat di su bida. Pero tambe ta posibel pa desaroyá diferente tipo di vila riba e isla aki. Tin un kavel speshal pa pone un steiger i un helikòpter por yega fásilmente na e isla.

E isla tin 30 mil meter kuadrá pa konstrukshon. E promotornan ta bisa ku ta posibel pa esnan interesá mira e área di serka. Nan ta propagá nan mes komo un empresa ku tin 25 aña ta traha riba e tereno aki. Por haña e preis ku ta pidi solamente si hasi un petishon spesífiko i demostrá un interes genuino di e intento pa kumpra.

Por sierto ku tin mas isla kaminda tin hende ta biba na Kòrsou den forma eksklusivo. Algun di nan ta habitá pa mionarionan lokal i internashonal.