WILLEMSTAD.- Kitando tur diskushon i spekulashon gerensia di Refineria Isla ta splika na su trahadónan ku ni nan di Isla ni PDVSA no por haña benefisio di pagonan dor di benta di produktonan entre otro. P'esei ta pidi e kumpradó pa paga e kreditornan na Kòrsou ku den e kaso aki ta trahadónan tambe direktamente.

Pa loke ta e di dos pago gerensia di refineria Isla ta splika ku nan a komprondé ku na e momentu aki pa parti di e kumpradó, esaki no por sigui komo un kompra manera a hasi ku esun promé. E kumpradó designa pa PDVSA ta e mesun ku a hasi e promé kompra. Manera e kumpradó a informá, RDK no ta dunando instrukshonnan  bon kla. Esaki por konfirmá pa e forma ku RDK a informá e komunidat den medionan di komunikashon dia 9 di mart ku RDK tabata bai manda un proposishon e mesun siman ei. Esaki tabata 8 siman pasa despues ku e lisensia anterior a ekspirá dia 15 di yanüari 2020. E 8 siman pèrdí ei por a keda usa pa kumpli ku kualke oro instrukshon.

E kumpradó a informá gerensia di refineria Isla ku e lisensia ku e kumpradó lo usa ta un lisensia  no. Venezuela-EO13850-2019-363328-1. Isla konosé e lisensia ei. Esaki ta literalmente establesé den e sekshon 1 “mara na kondishonnan i limitashonnan den e dokumento aki, e persona di Merka ta outorisá pa partisipá den tur transakshon i aktividatnan ku normalmente ta nesesario pa e resolushon di reklamo pa parti di Refineria di Kòrsou NV RDK i otro kreditornan ku sede na PDVSA i su designadonan Refineria Isla SA i Refineria Isla Curacao BV derivá for di PDVSA i e operashon di Isla di refineria di petrolio di Kòrsou i terminal i e siere di e aktividatnan di RDK ku ta involukrá PDVSA òf Isla ku ta surgi for di PDVSA i e operashon di Isla di e refineria di petroli di Kòrsou inkluí pero no limitá na e provishon di servisionan finansiero,’ shipping’, almasenahe, maneho i benta di produktonan venesolano, orígen di petroli i su derivadonan.

Den e karta gerensia di Isla ta inkluí tambe e lisensia aki pa e trahadónan por tuma nota di dje. Gerensia ta bis a ku eks trahadónan i algun trahadó aktual ta kreditornan ku sede na Kòrsou. E sekshon 2 di e lisensia ta indiká ku Isla i PDVSA no por risibí benefishinan di e pagonan; “E outorisashon den sekshon 1 no ta outorisá niun pago òf transferensia di fondo na benefishinan di PDVSA òf Isla”.

E kumpradó a informá Isla dia 6 di mart di e posishon di RDK pa loke ta e idea di un kuenta di depósito di garantia ku RDK tambe a indiká na prensa djaluna 9 di mart di dje. Isla tambe a hasi un proposishon verbal na e kumpradó dia 6 di mart pa kumpli ku e lisensia pidiendo e kumpradó pa e hasi e pagonan na e otro kreditornan di Isla ku base na Kòrsou. Pa ratifiká e proposishon Isla a manda un karta fecha 9 di mart 2020 na e kumpradó pidiendo i indikando ku e mesun kumpradó realisá transferensianan na e kreditornan lokal.