DEN HAAG.- E islanan di Karibe Ulandes i Ulanda a sostené otro bon te ainda durante di e pandemia di COVID-19. Esaki por dedusí for di kontesta di Sekretario di estado pa salubridat, desaroyo i deporte, Sr. Paul Blokhuis. Sr. Blokhuis a kontesta preguntanan ku miembro di Tweede kamer Kuiken a hasi tokante di e notisia ku tabatin na kuminsamentu di luna di aprel esta ku:”Kòrsou no por tuma mas pashènt ku Coronavirus, paso Kuido Intensivo ta kompletamente yen”.
E sekretario di estado a indiká ku e forma kon gobièrnu ulandes ta sostené Kòrsou ta dor di tuma medidanan pa evitá ku e vírus ta sigui plama, pero tambe a oumentá e kapasidat di kuido, miéntras e ta kere ku mester vakuná e poblashon adulto di Kòrsou mas rápido posibel.
Mas aleu e sekretario di estado a bisa ku e rísiko di preshon riba kuido agudo i intenso a keda mas tantu posibel di dor di bon palabrashon entre e kuater hòspitalnan na Aruba, Bonaire, Kòrsou i St. Maarten tokante unda pashènt nan por bai.
Último simannan tabatin èkstra personal na St. Maarten ku a bai na e islanan ABC (Aruba, Bonaire i Kòrsou). Tambe via di e uitzendbureau merikano, AMI a manda èkstra personal pa amplia e kapasidat di profeshonalnan di Kuido Intensivo na Aruba, Boneiru i Kòrsou. Tambe a entregá e aparatonan nesesario na e hòspitalnan. Asta ta papia pa manda pashèntnan na otro paisnan den region, ora e kapasidat lokal no por akapará mas pashènt. Un ehèmpel ta ku Boneiru a manda 5 pashènt Colombia.
E ministerio di VWS no a papia nada ainda di manda e barku ZMS Karel Doorman na e islanan di Karibe Ulandes pa yudansa. Pa kualke sosten eventual por hasi petishon na ministerio di defensa. Defensa te ainda ta atendé ku kuido di trouma di herida i tin un kapasidat limitá na bordo di e barku aki pa por akapará e falta di kapasidat di kuido intensivo. Pero te ainda no a hasi petishon di sosten, e sekretario di estado a terminá bisando.