WILLEMSTAD.- Sekretario di estado hulandes Paul Blokhuis (Salubridat) ta ferwagt ku trayekto di bakunashon por sigui mitar di febrüari riba e islanan karibense di Reino Hulandes. Esaki Blokhuis a indiká den un karta ku el a manda djaluna 18 di yanüari na parlamento hulandes.

Manera ta konosí frizernan spesial pa warda e bakunanan a yega Kòrsou siman último kaba. E promé bakuna ku Kòrsou lo haña ta di e kompania Pfizer. Hulanda ta manda e bakuna Kòrsou. Bakuna di Pfizer mester ser wardá na -80 grado.
Segun Blokhuis tur pais i islanan di reino ta traha huntu for di luna di òktober aña pasá riba preparashon pa henter e trayekto di bakunashon. ‘E tres paisnan i tambe e tres islanan a traha plannan di ehekushon ku ta tene kuenta ku diferente senarionan. Puntonan importante den e senarionan ta entre otro logístiko, infrastruktura i personal.’
Blokhuis ta indiká ku a kumpra frizernan pa warda bakuna na -80 grado, na -20 grado i pa warda entre 2 i 8 grado.
Blokhuis tambe ta skibi ku e trayekto di bakunashon lo kuminsá na momento ku trahadónan di Instituto di Reino pa Salubridat Públiko i Medio Ambiente (RIVM) a kontrolá tur preparashon riba e islanan. Si nan ta bisa ku tur kos ta korekto por kuminsá ku bakunashon di trahadónan den salubridat i tur e otro gruponan di enfoke, manera hende di 60 aña i ariba.
Manera ta konosí ta intenshon pa duna tur hende di 18 aña i ariba na Saba i St. Eustatius un bakunashon mas lihé posibel. Esaki no ta konta pa hende muhé ku ta den estado.
Segun Blokhuis e diferente islanan i paisnan karibense den Reino Hulandes a traha plannan pa e trayekto di bakunashon. RIVM ta evaluando e plannan. ‘Si lo ta nesesario Kòrsou, Aruba òf Sint Maarten por haña un petishon pa asistensia.’ Esaki ta konta tambe pa islanan Boneiru, St. Eustatius i Saba. ‘Nan tambe por manda petishon pa mas asistensia si ta nesesario’, segun Blokhuis.