WILLEMSTAD.- Sekretario di estado hulandes Paul Blokhuis (Salubridat, Bienestar i Deporte) den karta pa parlamento hulandes (Tweede Kamer) a duna informashon tokante bakunashon pa indokumentadonan riba Kòrsou i e otro islanan Karibense di Reino Hulandes. Segun Blokhuis, ku ta di partido ChristenUnie, islanan i paisnan Karibense di Reino Hulandes a duna di konosé ku nan ta hopi konsiente di e importansia pa bakuná hende indokumentá tambe. Manera ta konosí Kòrsou, Aruba, St. Maarten, Boneiru, St. Eustatius i Saba a traha plannan di ehekushon pa e trayekto di bakunashon. Segun Blokhuis yudansa pa hende indokumentá ta den e plannan di ehekushon. Manera ta konosí trahadónan di Instituto di Reino pa Salubridat Públiko i Medio Ambiente (RIVM) awor ta kontrolando tur preparashon riba e islanan. Si nan ta bisa ku tur kos ta korekto por kuminsá ku bakunashon, asina Blokhuis a skirbi den su karta.

Blokhuis a reakshoná riba preguntanan di parlamentario hulandes Antje Diertens. Segun Diertens, di partido D66, 15 porshento di poblashon riba e islanan Karibense di Reino Hulandes ta konsistí di hende indokumentá.
Blokhuis mes no a duna komentario riba e sifra ku Diertens a menshoná. Uniko kos ku e ta bisa ta ku riba e islanan gobièrnunan ta hopi konsiente tokante e nesesidat pa bakuná mas hende posibel.
Blokhuis ta di opinion ku trayekto di bakunashon por kuminsá mitar di febrüari riba e islanan karibense di Reino Hulandes. E sekretario di estado ta indiká den su karta pa parlamento hulandes ku tur pais i islanan di Reino ta traha huntu for di luna di òktober aña pasá riba preparashon pa henter e trayekto di bakunashon. ‘Awor trahadónan di RIVM ta kontrolá tur preparashon riba e islanan. Nos ta warda riba nan reakshon promé ku nos por kuminsá bakuná.’

https://extra.cw/islanan-por-kuminsa-ku-proyekto-di-bakunashon-mitar-di-februari/