WILLEMSTAD.- Djasabra, dia 21 di sèptèmber 2024, Island Finance a partisipá orguyosamente na World Clean Up Day 2024 na Kòrsou limpiando un área den serkania di nan ofisina na Sta. Maria.

E tema di e evento di e aña aki tabata ‘Superheroes’ ku enfoke riba un ambiente mas limpi, mas sano i mas bèrdè pa henter pueblo di Kòrsou. E esfuerso aki ta enfatisá e menasa ambiental signifikativo ku shushi ku no ta disolvé naturalmente, partikularmente plèstik, tin i e efekto devastador ku tin tantu riba nos bienestar komo e sistemanan ekológiko.

Island Finance tabata mashá entusiasmá pa uni forsa ku mas organisashon ku a kompartí e kompromiso pa atendé ku e problema kresiente di maneho di shushi den komunidat. E ekipo di boluntario dediká a traha huntu, kolektando i surtiendo shushi di kaya pa disponé di esaki responsablemente.

Island Finance a enfatisá ku e nifikashon di e inisiativa ta mas amplio i ku e evento aki ta uni individuo, organisashon i kompania ku e meta di konsientisá i aktua pa yega na transformashon signifikativo di komportashon di komunidat. Tur hende ta enfrentando e retonan di kambio di klima, polushon i kontaminashon loke ta motivá Island Finance pa sigui ku nan kompromiso pa kontribuí ku nan esfuersonan boluntario. Island Finance ta yama danki na Curaçao Clean Up pa permití nan partisipá na e kousa vital aki i na nan ekipo di empleado ku a kontribuí na e inisiativa spesial aki.