WILLEMSTAD.- Ayera tardi na ofisina di EXTRA a tuma lugá e entrega di premio na Sra. Ivy Coffy ganadó dje kampaña ‘Rei ken ta Rei òf Reina di Tumba 2018’.
Un Ivy sumamente kontentu ku den e 60 personanan ku a logra di saka e kombinashon korekto ela gana. ‘For di ora ma risibi e yamada mi a keda hari henter anochi. Antes mi tata defuntu i ami tabata sigui Festival di Tumba i tur aña nos ta logra di saka e ganado. Despues ku mi tata a fayese ma sigui ku e tradishon i ta sigui e festival ku atenshon. E aña aki ma skucha tur e tumbanan. Djaweps ma bolbe skuchanan i a yega na e kombinashon ganado’, asina un Ivy sonriente a konta ‘DEN E BEMBE’.
Ora ‘DEN E BEMBE’ a mustra Ivy e pakete kompletu ela keda masha kontentu i a gradisi pa e premio. ‘Ivy ta kon bo ta hasi awo? , ta hopi kos bo tin ku bai kune’.... ‘No wori, ma bin ku dos outo!’...
‘DEN E BEMBE’ ta spera ku Ivy gosa di Karnaval 2018 huntu ku su famia i disfruta di nan premio.