WILLEMSTAD. - Parlamentario Jacinta Constancia ta hopi disgustá ku e reakshonnan ku a bin den su direkshon despues ku el a desmayá e siman aki den pleno aktividat parlamentario. Den e tumulto ku tabatin den Staten djárason último na un dado momentu e parlamentario a medio sak den otro. Algun di su koleganan a yud'é i hib'é bèk paden den Staten. Riba retnan sosial i den algun medio a sugirí ku ta komedia e ta hunga i el a fingi ku el a bira malu. Hasta a insinuá ku e desmayo di Sra. Constancia tabata parti di e strategia total di oposishon. A papia di un plan di tres parti pa destabilisá gobernashon i den dje diferente protagonista tabatin nan mes ròl.

Den promé instansia Sra. Constancia a pone su number riba retnan sosial i a pidi tur hende ku tabatin kualke remarke òf pregunta pa no insinuá pero pa yam'é personalmente. E lo informá nan personalmente kiko a pas'é. Ayera sinembargo el a splika públikamente kiko a pas'é konkretamente e siman aki. E parlamentario a splika ku e tabatin un fèrkout pa un siman kaba. Banda di esei el a disidí di forma parti di un ayuno ku su iglesia a kuminsá dia 3 di yanüari último. "Ta algu ku mi a disidí di partisipá boluntariamente na e pasobra serka nos nada ta obligashon òf ta imponé. E idea ta pa durante tres siman kome kosnan di tera so. Esei a resultá muchu pa mi", asina e parlamentario ta bisa.

E parlamentario a bisa ku e tin un meta pa 2017 meskos ku hopi hende tin i lo sigui ku e meta aki ora kurpa ta mas mihó. E no a splika kua e meta aki ta. Loke si a duele ta ku a hasi chèrchè ku su kondishon. "Na esnan ku ta chèrchè ora hende ta malu, mi a pordoná bosnan kaba", asina e parlamentario ta bisa.

Sra. Constancia, disgustá pa e remarkenan den su direkshon den sentido ku ta un tipo di komedia el a hunga, a anunsiá ayera ku e ta sera su profil riba Facebook. Sinembargo el a haña hopi apoyo, tantu di amistatnan komo di otro personanan pa e keda aktivo. Básikamente a pidié pa no laga e forma ku a algun hende a hasi mofa di su kondishon e siman aki afekt'é. Te ayera nochi ainda e profil tabata funshoná.

Sra. Constancia a anunsiá den 2015 ku e lo no subi lista mas. Pa sorpresa di hopi, tòg el a revoká su desishon i regresá komo kandidato number 2 riba lista di MFK pa e elekshonnan ku a tuma lugá na òktober último. Aktualmente e ta un di e kuater miembronan di e frakshon aki. For di momentu ku Kòrsou a haña status outónomo na 2010, Sra. Constancia ta miembro di parlamento. Promé ku esei e tabata aktivo tambe den gobernashon insular di Kòrsou. Durante e periodo 2010 pa 2012 el a fungi komo minister di salubridat.