WILLEMSTAD – Durante oranan tempran di awe mainta, AMAK a risibí e notisia tristu ku Jacobo Colina ya no ta huntu ku nos mas.

“Despues ku a mira Jacobo Colina presentá dia 23 di desèmber último na Sambil durante di e Trombone Challenge, a tuma nota ku el a bira malu i a keda interná den CMC.”

Manera semper Jacobo a demostrá den su bida, ku e ta un persona luchadó i asina el a demostrá e dianan ku e tabata den hospital, kaminda el a hiba un lucha fuerte pa por rekobrá su salú.

Lamentablemente, esaki no a bira un realidat i awe nos a keda konfrontá ku e notisia tristu ku el a bai sosegá den brasa di Señor.

Jacobo ta un dje miembronan di AMAK ku fielmente tabata bishitá práktikamente tur reunion di AMAK, hasi preguntanan skèrpi i den mes un rosea semper e tabata tin konsehonan positivo pa e organisashon ku tantu e tabata stima.

“Na momentu ku nos tabata tin e proyekto Formashon Musikal ku tabata tin komo dosente prinsipal Sr. Alvaro Rojas, Jacobo tabata un dje alumnonan ku tabata sobresalí i tabata tuma e estudio di músiko hopi na serio.

Semper bai despues di e lèsnan di muzik,  tabata tin kòmbersashonnan profundo riba tur lokual ku ta sosodé riba tereno musikal i na momentu ku a bini e idea pa tene un manifestashon bou di direkshon di Feko Gomes, por a konta ku sosten di Jacobo Colina.”

Na momentu ku a bira konosí AMAK  a logra di optené e derechonan pa organisá Festival di Tumba, Jacobo Colina semper bai tabata saludá Feko Gomes komo: “monsieur le president”.

Jacobo Colina a aportá musikalmente en grande ku Festival di Tumba, skibiendo areglonan hopi eksitoso pa diferente grupo musikal. Jacobo tabata tambe un di e músikonan ku tabata dominá e arte di kaligrafia i defuntu Toro Colina semper tabata enkargá mayoria di su areglonan pa Jacobo skibi e notanan na man riba papel. E partituranan aki ta igual i te hasta mas bunita ku e printnan ku ta sali for di kòmpiuter aktualmente.

E aporte tambe di Jacobo na e diferente festivalnan nan manera den pasado Curinfest, Un Kanto pa Kòrsou i diferente otro Festivalnan partikular, tabata enorme.

AMAK i Kòrsou sigur lo bai sinti falta di un gran baluarte musikal manera Jacobo, pero nos ta hopi agradesido ku el a traspasá tur su konosementu musikal na su yu hòmber Gregory Colina, ku ta un di nos gran músikonan areglista i kompositor den Farándula di Kòrsou.

AMAK ta deseá  Gregory Colina, rumannan i demas famia kompletu hopi forsa den momentunan difísil aki. Físikamente Jacobo Colina a bai laga nos, pero el a laga atras e herensia musikal intangibel ku ta di gran importansia pa desaroyo musikal di nos pais.

Ku su alma sosegá na pas