Nada no ta pasando!

WILLEMSTAD.- E parlamentario i eks lider polítiko di Pueblo Soberano a anunsiá públikamente ku e ta entrega su retiro na e partido. Den algun palabra Córdoba a bisa ku e no ta mira ku e aktual dirigentenan di Pueblo Soberano ta hasiendo muchu den preparashon di e partido pa próksimo elekshon.

Córdoba a bisa ku e i mas miembro a pidi reunion general di e partido pero e aktual lider Ben Whiteman no a bai di akuerdo ku e petishon, sinembargo Whiteman a bisa ku e ta yama un otro reunion general. Córdoba no ta komprondé ki sentido tin pa rechasá nan petishon pa reunion general anto tòg e lider ke yama otro reunion general.

Córdoba a mustra ku nada no ta pasando den PS i esei no ta aseptabel si PS ke bai elekshon otro aña i saka bon resultado. ‘Elekshon no ta wega, ke men mester move”. E promé informashonnan ta indiká ku posiblemente Córdoba lo keda ku e asiento di Soberano.

Huntu ku Jaime Córdoba por a tuma nota ku e kolaboradó di Pueblo Soberano den Staten, Lucho Rosales tambe a traha un karta den kua e ta entrega retiro na PS. Mas detaye den edishon di EXTRA.