WILLEMSTAD. - Djárason 12 di sèptèmber tras di lomba outoridatnan hudisial a trasladá Eks Minister di Finansa George Jamaloodin pa Boneiru, despues ku djamars dia 11 di sèptèmber outoridatnan venezolano a ekstraditá Jamaloodin pa Kòrsou. Manera ta konosí, tabata un kaminda largu pa a logra trese Jamaloodin Kòrsou despues ku el a keda mas ku 18 luna den eksterior, na Venezuela.

Jamaloodin ta keda sospechá di ta e outor intelektual den e kaso di asesinato di Helmin Wiels mas dos kaso di froude ku ta sospech’é di dje.

Outoridatnan a logra trese Jamaloodin Kòrsou despues di vários intento, pa despues di un dia na Kòrsou, a traslad’é pa Boneiru kaminda ku por lo pronto e lo keda den detenshon, te ora ku su kaso bin dilanti den korte.

Na e momentunan aki Jamaloodin ta será den sekshon di hende muhé na Boneiru, mirando e echo ku tabatin solamente un persona femenino será den e sekshon aki.

Pa krea espasio pa Jamaloodin, a trasladá e sospechoso femenino prizòn na Kòrsou, pendiente su kaso keda tratá den korte na Boneiru.
E sospechoso aki ta sospechá di un kaso serio di intento di asesinato na Boneiru.

Jamaloodin ta keda sospechá den tres kaso penal, di kua un di nan e ta keda sospechá komo e outor intelektual di e kaso di asesinato di Helmin Wiels. Esaki ta e kaso ku tin mas atenshon riba dje.

For di fuentenan digno di krédito EXTRA a komprondé ku lo no trasladá Jamaloodin Ulanda, pa motibu ku e prizòn di Boneiru ta adekuá i ekipá pa enkarselashon pa tipo di sospechosonan manera Jamaloodin.

Ta sirkunstansianan hopi serio mester tin ku ta pone ku lo trasladá Jamaloodin pa Ulanda.

Na henter Boneiru tabatin solamente un hende muhé sera i tabata fásil pa trasladá un hende muhé pa prizòn na Kòrsou.

Jamaloodin ta para riba su inosensia den tur e tres sospechonan ku tin den su kontra i a duna di konosé ku for di aña 2014 Ministerio Públiko no a duna niun klase di interes pa skuch’é, asta ora ku na mas ku un okashon el a notifiká Ministerio Públiko ku e ta disponibel na kualke momentu pa tend’é, nada no a pasa.

Pero ta menshoná su nòmber den tres kaso penal i ora e analisá e kasonan en kuestion, no tin klaridat kiko defakto ta e motibu ku ke detené, asina Jamaloodin resientemente a enfatisá.

Pa loke ta trata e kaso ‘Passaat’, den e kaso aki Hues Komisario asta a sera e kaso. Pues detenshon den e kaso aki no ta nesesario, asina Jamaloodin a splika.

Den e kaso ‘Maximus’, Hues Komisario a pone Jamaloodin den libertat sin stipulá kondishon ku e mester tene su mes na dje. Pues detenshon den e kaso aki un biaha mas no ta posibel, segun Jamaloodin.

Fiskal enkargá ku e investigashon ‘Germanium’ a laga sa ku e lo no sa kiko e lo mester puntra Jamaloodin durante un seshon di testimonio. Esaki ta nifiká ku den e kaso aki tampoko tin interesnan vigente pa ku su detenshon.

Pues lo bira interesante den e simannan benidero, kiko lo bai pasa ku e kasonan i detenshon di Jamaloodin i ku Ministerio Públiko ta logra saka un “dagvaarding” kontra di Jamaloodin, prinsipalmente den e kaso Maximus.

Finalmente Jamaloodin a bisa ku na su debido tempu e lo proba su inosensia den tur e tres kasonan aki i tambe kon inhustu e sistema hudisial aki na Kòrsou a trata su persona, sigur despues di e veredikto di Fonseca, ora ku Korte a saka un komunikado di prensa, menshonando su nòmber komo outor intelektual.

Hustisia lo prevalesé, sea ta den Reino òf na un foro internashonal el a enfatisá.