Update:

Un ratu pasa por a tuma nota ku e tim di abogadonan di Jamaloodin tambe a yega korte konsistiendo di entre otro dr. Rutsel Martha kende por sierto tambe ta un eks minister. Den sala di korte Jamaloodin no tin paña oraño di presu, pero el a bista un flus. Vários ta e miembronan di famia Jamaloodin presente den sala di korte.

Jamaloodin ta na Kòrsou pa tratamentu di su kaso den korte

WIILLEMSTAD.-Jorge Jamaloodin, eks minister di finansa di Kòrsou i e persona será relashoná pa su posibel embolbimentu den plania i paga pa morto di e lider polítiko di Pueblo Soberano, Helmin Wiels. Korte a reserva tres dia pa e kaso aki i segun informashonnan risibí tur e dianan aki un tim di polis lo ta biahando ku Jamaloodin entre Boneiru i Kòrsou debí ku ya kaba a disidí ku pa motibunan di seguridat no ta permití Jamaloodin keda Kòrsou.   Awe mainta por a tuma nota momentu ku famia Wiels i tambe famia Jamaloodin a yega korte.

Awe mainta ku avion di Divi Divi, kompletamente reservá pa e kaso aki a transportá Jamaloodin pa Kòrsou i di einan a pasa mesora pa edifisio di Korte. Na Kòrsou tambe tabatin hopi preparashon for di den wikènt, speshalmente pa e parti di seguridat.

Manera EXTRA a informá resientemente, durante di tratamentu di preparashon Jamaloodin via video conference a indiká ku e no ta sinti niun nesesidat pa bin Kòrsou pa tratamentu di e kaso pasobra e ta konsiderá ku esaki lo bira un show di media, sinembargo wes a insistí i asta pone sierto grado di preshon pa e akusado komprondé ku su presensia ta nesesario durante di e tratamentu di e kaso aki.