WILLEMSTAD.- Djasabra 17 di sèptèmber lo tuma lugá apertura di Hòfi Mango dor di Jandino Asporaat ku estreno di Parke i lanseo di kurso di hortikultor. Durante apertura Asporaat lo introdusí tur invitadonan na e desaroyonan pendiente den e parke. Alabes lo selebrá komienso di e kurso di hardinero i hortikultor.
Manera ta konosí het Huis van Asporaat, ku ta kompania di produkshon di Jandino Asporaat, huntu ku Institute for Professional Excellence ta uni forsa pa amplia konosementu tokante kultivo i hardineria, kuido i komersialisashon di hortikultura i hopi mas pa medio di e kurso di hardinero i hortikultor ku lo tuma lugá na Hòfi Mango. Den invitashon pa e apertura ta skirbi: “Tambe Hòfi Mango ta estrená su naturalesa impreshonante ku lo sirbi komo plataforma pa desaroyonan riba tereno di Wellness.”
Jandino djabièrnè 16 di sèptèmber a hasi un ‘tour’ pa prensa lokal i otro invitadonan, den Hòfi Mango. Durante e kaminata Jandino a splika ku kasi tres aña pasa el a bishita Hòfi Mango pa promé bia den su bida. E tabata hopi impreshoná dor di bunitesa di e naturalesa. Segun Asporaat hopi yu’i Kòrsou no ta realisá kon bunita nan isla ta i kon impreshonante e naturalesa ta.

El a kumpra e tereno i den e último periodo Jandino i su tim a traha duru pa drecha e parke. Su soño ta pa kompartí e bunitesa di e parke ku Kòrsou. “E lokual ku mi a eksperensiá ora mi a bin den e parke ta e energia di naturalesa. Mi soño ta ku yu’i Kòrsou ta bin na e Hòfi i bira mas orguyoso di Kòrsou.” Tambe e ke inspirá i motivá mas hende posibel pa invertí di ‘wellness’ di Kòrsou.

Segun Jandino “wellness” por bira un industria grandi na Kòrsou. Segun Asporaat hopi turistanan ta interesá pa eksperensia mas di naturalesa di Kòrsou.
Durante e tour dor di Hòfi mango Jandino ta splika ku e parke tin hopi oportunidat, pero tabata será pa basta aña. Su soño ta ku hopi hende (yu’i Kòrsou í turistanan) ta bishita e parke i disfrutá e naturalesa.

Durante e kaminata Asporaat a splika ku e último dos aña i mei no tabata fásil. Jandino i su tim a traha duru pa haña koperashon i pèrmit nesesario pa drecha e parke. “Pero mi ta konvensí ku hopi hende lo disfrutá un bishita den e parke. Mi ta spera ku hende ta bin ku un mente habri. Ku nan ta habri pa e bunitesa i por mira tur posibilidatnan ku e parke ta ofresé.”