Aruba i Sint Maarten a haña fondo kaba!

WILLEMSTAD.-For di momentu ku Corona vírus a ataka mundu por a tuma nota kiko esei ta nifiká ku asta den paisnan pudiente tin hopi hende ku a konfrontá problema serio. E aktor yu di Kòrsou Jandino Asporat bibá na Ulanda a tuma nota di e situashon difísil ku hopi famia ta bibando aden na Kòrsou i a organisá un evento grandi na Ulanda pa generá fondo. El a logra generá bastante fondo tambe. Entretantu Aruba i Sint Maarten a haña nan parti kaba.

... Jandino Asporaat ..

Na e momentu ku Jandino a organisá e evento na Ulanda a pensa ku lo manda e fondonan pa un organisashon serio ku por pèrkurá pa distribushon hustu pa esnan ku tin mas nesesidat. E informe ku a plama tur kaminda, ku tin hendenan ku a haña asina tantu pakete di kuminda te ku nan a organisá Bon Kuné a pone ku Jandino a pone komo eksigensia firme ku mester sòru ku ta hendenan realmente den nesesidat ta haña e yudansa, esei Jandino mes a deklará na EXTRA.

Jandino mes ta sigui splika ku el a organisá dos evento pa generá fondo pa yuda e islanan, esun promé tabata entre su amigunan unda el a generá alrededor di 100 mil euro i despues el a organisá e evento mas grandi na televishon ulandes ku a produsí muchu mas tantu. Tur e plaka aki a bai mesora pa un organisashon ku mester kordiná e yudansa. Ku otro palabra Jandino Asporat no a keda ku ni un depchi di loke a generá. Ta trata aki di e organisashon Cordaid ku ya kaba tin eksperensia pa atendé ku tipo di sirkunstansianan aki. Cordaid ta traha den kolaborashon estrecho ku e organisashon Caritas ku tin un sukursal na Kòrsou tambe. Konsiente di korupshon i tipo di situashonnan fèrfelu a opta pa un organisashon ku por sòru ku e yudansa ta yega serka esnan ku realmente tin mester di dje.

Na sierto momentu por a tende ku Asporat lo ta kombersando ku gobièrnu pa loke ta trata repartishon di yudansa, pero di forma enfátiko el a deklará na EXTRA ku e no tin kontakto ku niun gobernante ni gobièrnu. ‘Mi ke yuda Kòrsou i saka Kòrsou dilanti, nada mas. Saka korupshon afó pa asina e yudansa por yega na esnan ku tin mester di dje”. Jandino ta sigui bisa ku e no tin organisashon pa bai atendé repartishon di yudansa p’esei a hinka e sèn den man di organisashon di hendenan serio pa atendé kuné. ‘Un kos mi ta hasi i esei ta pone preshon pa e organisashon hasi esfuerso pa topa ku hendenan den nesesidat. Nos poblashon tin e kultura di bèrgwensa i ta skonde ora nos tin mester. Mi tambe a lanta den pobresa pues mi sa kon esei ta. P’esei mester hasi mas esfuerso pa buska esnan ku realmente tin mester pa yuda nan. Mi ta preferá nan tuma tempu buska e hendenan ku tin mester i asina hasi un trabou responsabel. (file foto)