WILLEMSTAD - Manera ya a bira un tradishon JCI Willemstad ta duna atenshon i rekonosimentu na e promé beibi di aña. A toka turno na Curaҫao Medical Center pa yama bon biní na e promé yu di aña ku yama Kylian Ortega Gomez, kende a nase 10:59 AM ku un peso di 2390 gram i largura di 46 cm.

Su orguyoso mayornan ta Daniela Gomez Castro i Glifford Ortega . Un legria inmenso a reina, na momentu ku partera Dr. Henriquez asistí pa Dr. Jansen i  zusternan Fraites, Coco i Cordilia a yuda trese e beibi na mundu.

Presidente 2024 di JCI Willemstad Paul Leeflang asistí pa su Vise-Presidente Jacqueline Candelaria a bishitá e mayornan di e beibi pa felisitá i sorpresá nan ku algun regalo i opsekio. Promé beibi di aña 2023 .Jayvion tambe tabatin presente pa yama bin bini na su susesor. Presidente di JCI Willemstad, Paul Leeflang, a ekspresá su gratitut ku yegada di e beibi i tambe a duna felisitashon na e famia. Un danki speshal ta bai na tur spònsernan ku ta karga ku e proyekto tur aña di nobo. Un danki na Salas Sport Shop pa e plakat ku ta sirbi komo rekuerdo di e dia memorabel aki. Un bes mas JCI Willemstad a konta ku aporte di Freeport Jewelers ku a regala Kylian un bunita armband. Pietersz Distribution ku a regalá e beibi un pakete di pampers i wipes. Highlights Enterprise N.V. ku a regalá un rocking chair di Fisherprice i produktonan di Zwitsal. Na O Pourier Photography pa un professional photoshoot.  Esperamos Supermarket ku lo opsekiá 1 bolo, Super Kids ku a ofresé un pakete ku produktonan di beibi. Feel Rite Spa ku a regalá un welness gift card i Fun Miles ku a regalá un fun baby rompertje. 

JCI Willemstad ku su 63 aña di eksistensia no ta un organisashon deskonosí na Kòrsou. E ta un organisashon “non-profit” ku ta enfoká riba liderazgo i formashon di hóbennan entre 18 i 40 aña.