WILLEMSTAD - Kòrsou ta yama bon biní na su promé beibi pa aña 2025. Manera ya a bira un tradishon JCI Willemstad ta duna atenshon i rekonosimentu na e promé beibi di aña. A toka turno na Kraamkliniek Fundashon Duna Lus pa yama bon biní na e promé yu di aña ku yama Sianna Abisoina , kende a nase 07:03 a.m. ku un peso di 2795 gram i largura di 46 cm. Su orguyoso mayornan ta mama Suen Abisoina-Louisa i tata Jonathan Abisoina. Un legria inmenso a reina, na momentu ku e úniko partero maskulino na Korsou sr. Joel Grives den su promé aña na Korsou a yuda trese e promé beibi di aña. Broeder Albertoe, zuster Luciano-La Cruz i zuster Melfor-Gonet a asistí pa trese e promé beibi di aña na mundu.

Presidente 2025 di JCI Willemstad Alasha Tejeda asistí pa su Presidente saliente Paul Leeflang a bishitá e mayornan di e beibi pa felisitá i sorpresá nan ku algun regalo i opsekio. Promé beibi di aña 2024 Kylian Ortega  tambe tabata presente pa yama bon bini na su susesor. Presidente di JCI Willemstad, Alasha Tejeda, a ekspresá su gratitut ku yegada di e beibi i tambe a duna felisitashon na e famia. Un danki speshal ta bai na tur spònsernan ku ta karga ku e proyekto tur aña di nobo.

E aña aki ta e di 40 aniversario di proyekto di promé beibi di aña. Pa selebrá esaki sr. Tony Hernandez tabata tei presente. Sr. Hernandez tabata presidente di JCI Willemtad na aña 1985 durante su presidensia el a inisiá e proyekto promé beibi di aña. Tony Hernandez a yama bon bini na e beibi i a hiba algun palabra tokante e importansia di krea lider na un edat hóben. E bunita ta ku 40 aña pasa e promé beibi di aña tambe a nanse na Kraamkliniek Fundashon Duna Lus manera e aña aki.

JCI Willemstad ke yama danki na e spònsernan. E proyekto lo no ta posibel sin e sosten di e kompania I organisashonnan aki. Nan ta lo siguiente: Salas Sport Shop, Freeport Jewelers, Pietersz Distribution, Highlights Enterprise N.V., Knock Knock Kids I JOIA Collective, Biblioteka Nashonal Korsou, Belly Blossom Spa & More, Superkidz Curaçao, Ons kastje, MommiesAngels Curaçao, Baby Fresh Curaçao i Esperamos Supermarket.

JCI Willemstad te deseá pueblo di Korsou un aña 2025 yená ku prosperidat i tur klase di éksito.