WILLEMSTAD.- Mañan den oranan di mainta Jean Julien Rojer i e rumano Horia Tecau lo ta riba kancha di tènis na New York pa hunga e dòbel final kontra dje spañónan Marc i Feliciano Lopez. E duo ulandes/rumano ayera den un wega ku a kuminsá malu pa nan pa despues nan kue forsa, a logra nan klasifikashon pa e gran final dje Grand Slam di New York.

Rojer/Tecau den nan wega di ayera kontra di Kontinen/Peers a sali pèrdè e promé sèt ku diferensia grandi di 1-6. Pero despues di esei nan a rekuperá i den un di dos sèt hopi bringá a empatá e wega ganando 7(7)-6(5). Ku esei a bira nesesario pa hunga un sèt desisivo, ku a bira hopi sèt ku por a kai na tur dos banda. Finalmente Rojer/ Tecau ta gana 7-5.

Den e otro wega semi final, e spañónan Lopez a gana dje fuerte rumannan Byan 3-6, 6-3, 6-4.

Rojer/Tecau ta bai en buska di nan di 4 título di 2017, despues ku den luna di mart nan a triunfá den Dubai Open, siguí den mei ku Geneve Open na Suisa i por último den ougùstùs a gana e torneo Winsto-Salem na Merka.

Pa Jean Julien Rojer esaki ta bira su promé final di US Open. E úniko grand slam ku el a gana te na e altura di su karera ta Wimbledon (2015) miéntras ku na dos okashon el a yega te den semi final di Australia Open (2011 i 2015) i tambe French Open (2012 i 2015).