WILLEMSTAD.- Na 2018 e hóben Rigerno Jeno Schermer a kuminsá ofresé e servisio di stul i parasòl na turistanan ku ta bishitá Playa di Piskadó na Wespen. E tempu ei EXTRA a entrevistá Jeno pasobra nos ta kere ku mester duna empuhe na e personanan ku inisiativanan asina aki.

Jeno no solamente ta hür parasòl i stul, pero tambe otro ekiponan pa landa si e turista ta deseá esaki. Pero mas ku tur kos e ta tene e área limpi.

Tur mainta e tei tempran, e ta bari i hasi e área limpi pa ora e bishitantenan di e playa yega i ke hasi uso di su servisio.

Jeno a bisa EXTRA ku e no ke problema pero simplemente e ke duna servisio na bishitantenan. Ultimamente tin algun notisia a sali riba retnan sosial akusando Jeno di ta bende droga. Esaki no ta kuadra ku bèrdat. Na diferente okashon polis i instansianan ku ta kontrolá empresanan ta pasa i semper Jeno su kosnan tabata na òrdu.

Jeno a bisa ku e no tei pa kibra niun hende, tampoko e no ta envidiá niun ku ta hasi nan trabou honestamente i e ta kla pa duna un man kaminda esaki ta nesesario pero e ta pidi pa laga e tambe hasi su trabou. E tei pa Kòrsou.