WILLEMSTAD.- Nos niun por a pensa di eksperensiá algu manera bakunashon masal komo konsekuensia di un pandemia. I esaki ta algu ku ta konta pa paisnan rònt mundu. Pero Kòrsou den e lucha aki kontra COVID-19 a sa pa e no keda atras. E kantidat di hende ku a registrá te awor na tel. 9345 a surpasá espektativa di esnan enkargá. Pero for di di 1e di mart próksimo esnan ku ta deseá lo por registrá nan mes ‘online’, pues via di internèt. Asina Minister di Salubridat, Medioambiente i Naturalesa, sra. Zita Jesus-Leito, a duna di konosé na okashon di inisio dje trayekto di bakunashon aki na Kòrsou. E sentro di bakunashon a bira e sitio unda den boka nos konosé komo Poliklínika di SEHOS den Otrobanda.

Segun e minister, te ku ayera mèrdia ya tabatin mas ku 4.000 hende ku a registrá pa bakuná, i alabes nan a haña un di dos fecha pa bakunashon. Ta importante pa bisa ku e bakuna aki di Pfizer ta konsistí di dos parti.

Si tene na kuenta for di ki dia a start, anto por konkluí ku pa dia tin mas o ménos un mil hende ta registrá. Esei ta un bon señal i e ta spera ku e poblashon di riba 18 aña na Kòrsou por ta kompletamente bakuná.  Es mas, si tene kuenta ku e grupo di 60+ na Kòrsou ta konsistí di un 39.000 hende, pues por konsiderá ku un 10% di e grupo aki a registrá kaba. A haña e garantia di parti di Hulanda ku aki na Kòrsou nos lo risibí sufisiente ampùl pa tur hende por ser bakuná. For di un kòmbersashon ku e propio minister EXTRA a komprondé ku for di kada bòter dje remedi aki por pasa 3 hende angua, pues no ta kada un bòter ta pa bai un hende.

Segun e minister pasamentu di e angua kontra COVID-19 no ta unu obligatorio, pero si rekomendabel ya ku e ta bon pa kada ken. Pero e mes, tambe kolega Rhuggenaath i tambe un grupo di personanan konosí den komunidat a opta pa pasa e angua aki riba e dia di inisio pa asina demostrá nan sosten na e trayekto i esfuersonan.

Mas aleu sra. Jesus-Leito a splika ku for di djaluna 1e di mart lo habri e posibilidat pa kada siudadano ku ke por registrá ‘online’ tambe.

Konsientemente a skohe pa e aserkamentu aki ya ku segun kalkulashon lo tuma mas o ménos un siman pa evaluá i eventualmente trese ahuste den esaki pa e kana mas mihó i ta mas efisiente i efektivo. Kòrsou  tin un rekòr hopi abou di kontagio, i ta un desaroyo hopi bon. Komunidat a respondé di un manera sublime, i tur sosten ku nos por a haña a bin tambe.

I manera semper sra. Jesus-Leito ta bisa, e bakuna aki no ta obligatorio pero si rekomendabel.