Mc William:

WILLEMSTAD.- Pa lider polítiko di partido MAN-PIN, Giselle Mc William ta importante pa komunidat sa ki posishon lider polítiko di MFK, Gilmar ‘Pik’ Pisas i miembro di parlamento independiente Zita Jesus-Leito ta bai hasi awor ku lider di KEM, Michelangelo ‘Low’ Martines ta detené riba sospecho di trafikashon di droga i labamentu di plaka. “Mi no sa kiko ta nan pensamentunan na e momentonan aki, pero nan no por keda ketu”, Mc William ta deklará pa  EXTRA.

E ta mustra ku Jesus-Leito a bisa ku a trese KEM i su persona den e koalishon pa gobièrnu no kai i proyektonan importante por sigui. “Jesus-Leito ta un persona ku semper a bisa ku integridat ta importante pe, pues ta importante tambe pa e duna klaridat ta den ki direkshon e ta bai awor ku su partner di koalishon a kai será.”

Pa Mc William e diskushon si e gabinete tin sosten di un mayoria de parlamento no ta al kaso. Na su opinion miembro independiente Corine Djaoen-Genaro nunka a skonde ku e ta sostené na e gabinete. “Tambe frakshon di Trabou Pa Kòrsou tantu den e konstelashon bieu komo e konstelashon aktual di gabinete Pisas a duna sosten na e gabinete i mi no ta kere ku esaki a kambia.”

Loke pa Mc William ta mas fundamental ta e posishon di Jesus-Leito, ku komo eks lider di PAR i awor ku e ta independiente semper a enfatisá ku integridat ta algu primordial pe. Riba e pregunta kiko posishon di MAN lo ta si aserká e frakshon pa sostené gabinete Pisas II, Mc William ta bisa ku na 2021 e partido a bai atras na asiento i ku ta respetá e echo demokrátiko aki di forma profundo.

E partido a bai bèk den su seno pa evaluá i fiha rumbo di nobo. Den esaki a bini entre otro ku kambio di lider polítiko. Tambe a fiha e punto di salida ku MAN lo keda den oposishon i lo mantené e posishon aki te na final di e periodo di gobernashon, Mc William ta splika.

Screening

Otro pregunta kardinal ku Mc William tin relashoná ku e situashon aktual ta e proseso pa nombra ministernan nobo. “E proseso di screening a dura 10 siman kaba. Esaki no ta duna un bon sentimentu. Si e proseso ta dura asina largu ta kosnan profundo i fèrfelu mester averiguá.”

Mc William ta splika ku su proseso di screening a dura 2 siman i mei. “No ta tur kaso ta mesun kos. Tin hende tin por ehèmpel interesnan komersial ku mester pone riba distansia loke ta pone e proseso tarda, pero 10 siman ta hopi i no ta bon pa e imágen di e kandidatonan pa minister ni pa gobièrnu.”

E lider di MAN-PIN no por kita tampoko for di e impreshon ku kosnan no ta manera mester ta . “No tin un bista kiko ta bai pasa ku e kandidatonan pa minister i si despues di e aresto di e lider polítiko di KEM tin sosten pa nan ainda den koalishon.” Spesífikamente Mc William ke sa kiko ta bai pasa ku e kandidato ku Jesus-Leito a skùif dilanti.

“No por ta asina ku e kandidato di Jesus-Leito ta un ohochi Siames ku e kandidato di KEM manera partidonan ke laga kere. “Kada un kandidato ta pará riba su kurpa.” Finalmente Mc William ta mustra ku no ta deseabel ku e situashon kaminda solamente ministernan di MFK ta manehá pais, ta kontinuá pa mas largu.

“For di inisio di gabinete Pisas II no ta duna transparensia na komunidat. No ta tene konferensia di prensa i ta firma kontratonan sin informá parlamento promé. Riba esaki tin un káos konstitushonal ta tumando lugá awor.”

E sistema di koalishon segun Mc William ta hustamente pa trese balansa i sòru ku tin kontròl interno den Konseho di Minister, pero ku e situashon aktual e balansa i kontròl aki no ta eksistí mas. Riba esaki ta bini pues e echo ku gabinete Pisas II no ta transparente. “Awor ta na promé minister Pisas asumí su responsabilidat i ser un lider di pais.”

Foto:

...Giselle Mc William...