WILLEMSTAD.- Den boka di pueblo nos konosé komo parke di tráfiko kual su nòmber original ta “Jeugd Verkeerspark”. Ta konosí ku for di 2010 e parke aki, ku nos hopi a pasa aden, praktikamente nos patrimonio nashonal, no a risibí supsidio di Gobièrnu I ta yegando na e fasé kaminda ta hopi difísil pa siguí manehá esaki sin yudansa finansiero. Esaki ta informashonnan ku EXTRA ta dispone di dje, ku a sali di personanan ku ke mira un kambio, ke pa e ta e parke di tráfiko bek manera ántes.
Aktualmente e parke no ta den un bon estado i e organisashon ku ta manehá e parke aki su espasio finansiero ta hopi limitá. Ta operando ku algun boluntario pero segun informashon por premirá ku esaki tambe por yega su fin ya ku e boluntario apénas tin material pa operá nos parke di tráfiko.
Ken no a yega di bai di bishitá na nos “ jeugd Verkeerspark” i a keda ku grato rekuerdo di a risibí edukashon di tráfiko den ántes klas di skolnan básiko i awor grupo shete di enseñansa di fundeshi. Kasi sigur esei lo ta bo deseo tambe pa nos futuro generashon. Esaki ta danki na e kompania Shell, ku ántes tabata doño di nos refineria, ku den kuadro di 50 aña di su eksistensia e tempu ei a regalá komunidat di Kòrsou un parke di tráfiko. E meta tabata pa for di chikí nos muchanan por sera konosí ku e reglanan básiko di tráfiko den un forma práktiko.
E tempu ei diferente instansia a kere den e kousa i konhuntamente a uni forsa i a duna nan koperashon pa e soño aki por a keda realisá. Nos ta papia aki di entre otro SNAV ku awe ta Curoil, ABC Busbedrijf, kuerpo Polisial i Gobièrnu di Kòrsou.
Despues di tempu agentenan polisial a keda remplasá pa maestronan di skol. A palabrá ku Servisio di asuntunan di Enseñansa ta pone dos maestro na disposishon di Vereniging Veilig Verkeer i Direktiva di skolnan katóliko un maestro. Ku yudansa di e tempu ei Gobièrnu Insular di Kòrsou a konstruí un lokalidat pa duna lès tambe. Lions Club ku tambe a mira importansia di e edukashon di tráfiko a duna un man den e kuadro di nesesidatnan di material edukativo pa den e lokalidat di duna lès aki. Esaki ta nifiká ku for di e tempu ei nos muchanan tabata haña banda di lèsnan práktiko di tráfiko tambe e parti teorétiko di tráfiko. Te ainda tur skol di Kòrsou ta bin di bishita den nos kompleho di tráfiko.
Desaroyonan riba diferente nivel riba nos isla manera entre otro skarsedat di maestro, situashon finansiero di Gobièrnu, seramentu di sierto servisionan di Gobièrnu èts., ku a kuminsá manifestá su mes for di den añanan nobenta a pone ku poulatinamente e koperashon di añanan ku tabata eksistí a kuminsá bai atras. Algun ehèmpel ta ku Gobièrnu a stòp supsidio, e dos direktivanan di skol a yama nan maestronan bèk, Dienst Arbeidszorg no por a sigui ku mantenshon di e parke. Curoil N.V. ta úniko e instansia ku te ainda a keda duna su koperashon na nos Jeugd Verkeerspark pero esaki no ta sufisiente ya ku tin hopi mes ku mester wòrdu hasi.
Resultado ta ku práktikamente Jeugd Verkeerspark no tin e espasio finansiero òf e koperashon nesesario pa por sigui manehá e kompleho aki di un forma adekuá. Si e union den koperashon den nos komunidat mes, no bin bèk pa reskatá e patrimonio nashonal aki, ta premirá ku riba término kòrtiku esaki lo bai pèrdí.
Esaki kasi sigur lo no ta e deseo di nos dushi abitantenan di Kòrsou. P’esei ban duna nos parke di tráfiko e sosten ku e meresé.