WILLEMSTAD.-  Korte di apelashon a kondená  Milelvison “Joao” Andrade na 16 aña ayera. Esaki despues ku el a apelá pa motibu di a keda kondená na mesun kastigu den korte di apelashon. Ta  trata di e kaso  yamá  “Scooter” kaminda e víktima  Antonio Paulina di 22 aña a keda tirá den su garganta den su propio kurá dia 20 di mei 2015. Esaki pa motibu ku su kontrinkantenan ta sospech’é di ladronisia di skuter. Andrade huntu ku su ko-akusadonan ta  haña ku nan a keda kondená inhustamente  i a para riba nan inosensia. Den e kaso aki Milelvison “Joao” Andrade, Huntley  “Djaka” Alias, Gerswin  “Ge’” Bonifacio i Elvericks Juliana ta esnan ku a keda akusá.  Andrade a duna di konos’é ku e  tabata na kas serka su famia i no sa nada di e kaso. Abogado Vaders a bisa ku Juliana ta e úniko ku a bisa ku su kliente tabata presente.  Tambe e abogado a duna di konos’é ku mama di e víktima no por deskribí su kliente na promé lugá. Ta dia ku el a mir’é den korant el a bisa ku ta e hòmber ei  tabata den su kurá. Segun e abogado den konfrontashon di foto tampoko e  mama no por a rekonos’é Andrade. Tribunal di korte di apelashon a pensa otro. Segun e veredikto tin 3 testigu ku ta konformá e loke e akusado Juliana a deklará inkriminando su mes. Segun hues tantu Andrade komo Bonifacio a hasi nan mes kulpabel  na e asesinato aki mirando kon persistentemente nan a bai kas di e víktima persiguié i likid’é pa motibu ku nan a insistí ku ta Paulina lo a hòrta nan skuter. E tribunal a duna di konos’é ku Andrade niun momento no a tuma su responsabilidat i no a hunga karta habrí ku hustisia. Segun e veredikto mas aleu ku rapòrt sikiátriko a bisa ku Juliana ta kompletamente responsabel pa su akto nan. Korte ta impon’é un daño perhuisio di fl 5048,57 pa e gastunan di entiero ku e famia tabatin.