WILLEMSTAD.- Ayera mainta Korte di Apelashon a kuminsá ku e huisio penal kontra di èks minister di finansa, George “Jorge” Jamaloodin. Tratamentu di e kaso a tuma lugá den “sporthal” di Marina Kazèrne na Suffisant bou di vigilansia estrikto di kuerpo polisial.
Jamaloodin su abogado ta Mr. Franken for di Hulanda huntu ku Eldon “Peppie” Sulvaran, ku ta keda asesorá pa un tim di Mvr. Athena Sulvaran, Dr. Ruthsel Martha i Mr. Mirto Murray.
Jamaloodin a apelá e sentensia di 28 aña di prizòn ku el a haña den luna di ougùstùs di 2019.
Korte a haña proba “uitlokken” (provokashon) pa asesiná Helmin Wiels dia 5 mei 2013. I kaso Germanium ku ta malversashon di plaka di supsidio di gobièrnu, i e di tres kaso ta “Passaat”, kaminda ku ta akus’é di lo a kometé falsifikashon di dokumentu i kometé froude ku e loke ku nan ta yama “inkeerregeling”. Korte no ta haña esaki probá i a apsolvé e akusashon aki.
Ayera korte a kuminsá trata e kaso Passaat. Ta trata di skirbimentu di fecha riba un dokumento di “Inkeerregeling” kaminda hendenan ku tin sèn den eksterior i no a duna datos korekto na inspekshon di belasting, ta haña oportunidat pa trese e sèn Kòrsou kontra pago di un but hopi abou.
Di akuerdo ku hues, segun testigunan, Jamaloodin siendo minister di finansa tabatin hopi urgensia pa e Taskforce terminá e Inkeerregeling. Ta resultá ku un dje personanan ku tabata atendé ku e asuntu di Inkeeregeling tabata eksperto finansiero di su ruman Robbie Dos Santos. Asina ku a regla e Inkeerregeling, mesora Dos Santos a akudí na e eksperto finansiero aki pa yud’e saka parti di su sèn for di Merka pa trese Kòrsou.
T’asina ku e dokumento di Inkeerregeling a keda kla dia 11 di aprel, pero ora di firma esaki, Jamaloodin a pone e fecha di 7 di aprel, miéntras ku dia 6 di aprel, su ruman Dos Santos tabata serka e eksperto finansiero/fiskal ku ta atendé ku e Inkeeregeling. Dia 11 di aprel mesora Dos Santos a hasi uso di e Inkeerregeling.
Hustamente e sèn ku Dos Santos ke a trese Kòrsou tabatin investigashon penal di kaso Bientu ta andando.
Tambe Hues a mustra Jamaloodin riba deklarashon di hefe di MOT kende a bisa ku Jamaloodin a prohibié di duna informashon di su famia komo di Jamaloodin na RST.
Jamaloodin a nenga di hasi algu robes den e kaso aki. El a bisa ku Inkeerregeling ta parti di un plan di belasting. E asuntu di ponementu di fecha, Jamaloodin no ta mira ku el a hasi nada malu. El a bisa ta dor ku dia 7 di aprel den rueda di prensa el a anunsiá e “Inkeerregeling”, i for di e momentu ei e Inkeerregeling a drenta na vigor. Pues dia 11 aprel ku el a haña e dokumento, el a disidí pone e fecha di 7 di aprel.
Tambe el a desmentí ku e lo tabata na altura ku Robbie Dos Santos su ruman lo kier a trese sèn Kòrsou for di eksterior. Tampoko ku e ta na altura di investigashon penal kontra di Robbie, i ta p’esei lo a yuda e ruman p’e por a trese su sèn Kòrsou.
Jamaloodin a bisa hues mas aleu ku komo minister e no tabatin influensia ken si òf ken no, no por a hasi “Inkeer”.
Loke pa e taskforce tabata remarkabel ku ta Robbie Dos Santos so a hasi uso di e “Inkeerregeling, pero esei no tabata e kaso, paso segun e abogado finalmente 16 hende a hasi uso di “Inkeerregeling”.
Fiskal Out a puntra Jamaloodin pa splika kombersashon di telefòn entre Robbie i su persona. Nan ta papia ku outoridatnan a konfiská dos ènvelòp den kual tabatin “statement” di dos kuenta bankario di kuenta ku Dos Santos tin na Merka. segun fiskal riba e kuenta aki tin alrededor di 30 mion dòler ariba.