WILLEMSTAD.- ‘E ta opvio. Meskos ku rònt mundu nos na Kòrsou tambe lo sinti konsekuensia di e konflikto militar na Ukrania. E tin di aber ku e guera riba su mes. Pero tambe e tin di aber ku e reakshon riba e guera, den forma di sanshonnan ku diferente pais oksidental a instalá kontra Rusia kaba pa motibu di nan operashon militar kontra Ukrania.’ Asina direktor finansiero- ekonómiko di Banko Sentral pa Kòrsou i Sint Maarten dr. José Jardim a bisa den un entrevista ku EXTRA.
A entrevistá Jardim pa haña su bista tokante e konsekuensia di e guera ku Rusia a kuminsá siman pasá kontra Ukrania. Na promé instansia konsekuensia pa ekonomia i situashon finansiero di Kòrsou i Sint Maarten.
Na promé instansia Jardim ta ekspresá su kombibensia ku pueblo di Ukrania. Despues e ta splika ku ‘Reino Hulandes tin un posishon hopi kla tokante e konflikto aki. Nos ta lamentá tur pèrdida humano ku ta sosodiendo na e momentonan aki.’ E ta spera ku na un manera diplomátiko por yega mas lihé posibel na un solushon di e konflikto.
Jardim: ‘Geográfikamente e guera ta hopi leu for di nos. Esei no kier men ku nos no sinti e konsekuensia di e konflikto. Resientemente nos tabatin un situashon ku covid-19. Apénas nos a sali for di pandemia di covid-19, nos ta haña nos mes den un konflikto militar ku lo afektá henter ekonomia mundial.’ Segun Jardim pandemia a mustra ku niun pais no ta inmune pa un vírus asina. Tur pais a haña infekshon i kasonan mortal. ‘Pero tambe den e sentido ku e pandemia a afektá e fluho ekonómiko rònt mundu.’
Relashoná ku sanshonnan di diferente pais oksidental, Jardim ta bisa: ‘Nos a tende esaki hopi kla for di diferente mandatarionan di Union oropeo. Nan tur ta konsiente di e sanshonnan ku ta dirigí. E sanshonnan tin komo meta pa debilitá e ekonomia ruso i na e manera ei limitá su posibilidat pa finansiá e guera. Na dos lugá pa originá un sierto malkontentu ku for di paden di komunidat ruso kuminsá surgi opheshon den direkshon di e guera. Pero e mesun lidernan oropeo ta menshoná ku apesar ku e sanshonnan lo afektá ekonomia ruso e ta bai afektá nan mes na Oropeo tambe. I esei kier men ku e ta bai afektá nos na Kòrsou tambe.’