Hyundai Ionic ta na su disposishon

WILLEMSTAD.- Djabièrnè atardi e kantante i pianista yu di Kòrsou Juni Juliet a haña di e agente Crown Automotives na Kaya Tula riba Ser’i Dòmi un Hyundai Ionic na su disposishon. T’e nan a selektá, pasobra e ta personalidat amabel ku rekonosementu internashonal komo artista i plasentero. E outo aki, ku stekernan di plak riba dje di e agente i di Juni Juliet su kompania di entretenementu, lo hala atenshon tur kaminda ku e bai klaro, ku eksepshon na pòmp di gasolin pasobra ei e no ta bai; di pursi, tur otro kaminda por karga e outo aki. Pronto tur hende atraves di medionan sosial por sigui kon Juni Juliet ta eksperensiando pa kore den e outo eléktriko aki.

Djabièrnè staf i personal di Crown a yam’é bon biní di ta kore ‘green’ i di a djòin e famia di Hyundai. Juni Juliet mes a sòru pa pone ambiente kaminda nan a ofresé un bríndis i kos pa ches na esnan presente. Konforme palabrashon, den e tempu binidero e lo kore rònt den e outo aki, bishitando evento tambe kuné, di tal moda ku di un forma inventivo e ta hasi promoshon pa e vehíkulo moderno i limpi aki. Meta ta tambe pa e yuda hasi hende mas konsiente ku e Hyundai Ionic aki ta bon pa medio ambiente, ya ku e ta e medio di transporte pa futuro.