WILLEMSTAD – Bon notisia pa e selekshon di Reino, Jurickson Profar a duna di konosé na MLB. com ku su dede mei mei ta bon i ku e lo sigui ku su partisipashon den World Baseball Classic. Manera Mundu Deportivo di EXTRA a informá ayera, Profar a sinti su dede na momentu ku el  tira kabes na tersera den su intento pa yega safe. Manager Hensley Meulens  a saka Profar for di wega  komo prekoushon. Si e leshon tabata mas serio, tabata eksistí e posibilidat ku e organisashon na kual Jurickson Profar ta pertenesé, Texas Rangers, lo por a manda yama e pelotero yu di Kòrsou bek. Ku e bon notisia aki, Profar lo ta bek den aliniashon di e próksimo wega di Reino kontra di Hapon.