WILLEMSTAD.- Hopi duru ta pa un kriadó di bestia dediká su tempu pa lanta su animalnan, i pa den un ratu di ora e pèrdè un gran kantidat di nan dor di atake di kachó. Esei ta e kaso serka un kriadero na den e region di St. Joris.

T’asina ku den mardugá pa bai kue mainta di djaluna último kachó(nan) a drenta den kurá di Kriadero Babetti na St. Joris i kousa un masakre di otro mundu. Nan a mata komo 3/4 parti di e krio di karné ku tin aya. Remarkabel tabata ku e kachó(nan) aki lo a haña tur tempu pa nan ataká ya ku asta nan a kuminsá kome for di diferente dje animalnan ku a ser matá.

Relashoná ku e masakre aki EXTRA a sostené un kòmbersashon ku e doño dje kriadero i el a splika ku e daño ku el a sufri ta konsiderabel. Di un krio di 36 karné ku e tabatin, el a sobrá apénas 9, loke ta nifiká ku 27 bestia a ser matá, ku ta ekivalente na ¾ dje manada. Es mas, ainda e lo por lanta den e dianan aki ku karné morto, komo ku tin algun ku ta heridá. E veterinario ku a asistí a limpia nan heridanan i pasa nan angua, pues e ta spera ku ta logra skapa e nuebe nan aki.

Segun e doño, na momentu ku el a yega den e kurá den mardugá ainda tabatin un kachó komiendo riba un di su bestianan. El a lòs dos tiru riba esaki, pero milagrosamente el a skapa. E ta kalkulá ku e kachó aki a bini komo ku tin karné ku ta den e proseso pa bai wèrp, pues nan ta sinti holó i ta reakshoná riba esaki.

No ta promé biaha ku kachó ta ataká su bestianan. Es mas, e kachó(nan) aki ta di un persona ku tin su kas den bisindario. E mes no ta biba aden, pero ta laga kachó den kurá pa vigilá. El a atvertí e bisiña aki na mas ku un okashon pasobra el a tira un kachó di dje na un okashon anterior kaba.

Nan no tin problema ku otro, pero loke si e por bisa ta ku e daño kousá dor di su kachó ta konsiderabel i e lo tin di kompensá pa esaki. Na gastunan di veterinario so el a saka mas ku fl.900.- kaba, pa no papia mes di e 27 karnénan, hopi di rasa, ku a ser masakrá. E doño ta kalkulá e daño ku el a sufri na mas ku 30 mil florin.

E tipo di kosnan aki por desanimá un persona ku ta kria bestia, i esei a sosodiendo hopi na Kòrsou, sea pasobra kachó ta mata nan òf nan ta ser hòrtá. Den su kaso tabatin karnénan di rasa karu (Dorper) i tur a ser matá. El a gasta hopi sèn resientemente pa remedi for di Hulanda, pa por a “ontworm” e bestianan pa nan ta den bon kondishon. Hopi sèn e ta gasta semanalmente na kuminda spesial.

E ta spera ku pa dje instansianan kompetente e lo por ser kompensá pa por kumpra un kantidat bèk.