WILLEMSTAD.- Den e relatonan anual di Selikor por lesa ku uso di landfill Malpais en prinsipio ta grátis pa tiramentu di sushi doméstiko, pues sushi di kas. Kompanianan ku ta transportá desperdisio òf kompanianan ku ta hasi negoshi ku tiramentu di sushi afó si tin di paga pa nan usa landfill. Pa aña kada kas riba Kòrsou por depositá 1.000 kg (1 tòn) di sushi di kas na landfill, banda di e sushi ku Selikor ta rekohé semanalmente na kas. Asina SER ta bisa den un relato ku ta kontené konseho riba un proyekto di lei ku a keda entregá dor di Parlamento pa trese adaptashon den tarifanan di sushi.

Esnan ku a entregá e inisiativa di lei ta di opinion ku si no kobra pa tira sushi na landfill. Den e konsiderashon esnan ku a tuma e inisiativa ta ekspresá e deseo, pa evitá tiramentu di sushi den forma ilegal, baha e tarifanan pa tiramentu di sushi na Malpais i e stashon na Koraal Specht òf te asta duna eksonerashon, pero di otro banda hisa e butnan ku ta ser duná pa tiramentu di sushi ilegal.

Mas aleu SER ta bisa ku, e tin duda ku a base di e kambionan ku ta ser proponé si realmente esaki lo kondusí na e resultadonan deseá.  E úniko pregunta importante ku SER lo tin den e kaso aki ta, si enberdat tin un relashon kousal entre redukshon di e tarifanan pa tiramentu di sushi na Malpais i Koraal Specht òf dunamentu di eksonerashon, i di otro banda prevenshon di tiramentu di sushi ilegal, manera esaki ta ser menshoná den e proyekto di lei.

Esnan ku a tuma inisiativa ta bisa ku defakto tur partikular, sin importá e altura di nan entrada, tin eksonerashon pa loke ta tiramentu di sushi di kas na landfill. Den e mesun rosea nan ta splika ku tin biaha sa kobra un suma di fl. 30.- pa 1.000 kg, pero ku esaki ta un estorbo pa tira sushi na landfill. P’esei nan ta proponé pa krea e posibilidat den lei pa  duna eksonerashon di esei.

SER ta konsiderá e proposishon pa amplia e eksonerashon komo algu no oportuno ni konsehabel. Por sierto, partikularnan no mester paga aktualmente pa tira sushi di kas na landfill, a lo ménos no pa e promé 1.000 kg. Pues un kambio dje lei no ta oportuno.

Ademas ta eksistí e riesgo ku esaki lo por tin komo konsekuensia ku hendenan ku tin un entrada haltu awor lo tin di bai paga pa tira sushi asta pa e promé 1.000 kg, i esei no ta deseabel tampoko.