WILLEMSTAD.- Outoridatnan envolví den e aktividatnan di kòntròl rònt di Fuikdag lo tin atenshon spesial pa e fenómeno di “watertaxi”, esta botonan ku ta transportá hende te na e aktividat di Fuikdag. Riba su mes en prinsipio no ta un problema, pero e dolónan di kabes ta bini despues na final di e aktividat. Eksperensia a demonstrá ku tin hopi hende ku ta bia ku “watertaxi” ta tuma e riesgo di bai Fuikdag sin sa kon nan ta regresá kas, i finalmente ta bin topa ku nan di dualu riba tereno di Santa Barbara Plantation, ku intenshon di kana bai kas. Segun sra. Shalick Clement, bosero di Wardakosta, sa sosodé ku hopi hende ta ser transportá ku botonan di plaser sin tin e garantia kon nan ta bai bèk.

Na final di Fuikdag, ku ta 5or di atardi, e nave ku a fungi komo “watertaxi” ta dal un trep so di regreso, i asina tin hende sa keda atras. E hendenan aki ta opta pa subi tereno privá di Santa Barbara. E tereno aki ta hopi grandi i ta eksistí e chèns ku hendenan ta pèrdè, i asina nan problema ta bira di outoridatnan ku tin di yuda nan kue kaminda pa kas bèk. Pues lo no permití pa simplemente duna hendenan kabes di boto pa Fuikdag.

Tur hende ku ta bai Fuikdag mester bai riba un boto ku e garantia ku nan tin transporte pa bai tera bèk. Uso di tereno di Santa Barbara Plantation ta prohibí pa kue direkshon di siudat, ya ku esei ta kontribuí na káos.

Segun sra. Clement, den kaso ku tin botonan di charter ku ta bai ku un kantidat di hende lokal i turista, kabesantenan di e charter mester kòrda duna e personanan aki nan banchi pa pone na nan pòls pa asina identifiká nan mes komo partisipante na Fuikdag. Riba e banchi aki lo mester tin nòmber di e boto, pa si a kaso e persona pèrdè, por yuda esaki pa haña su kaminda bèk.

Manera ta konosí, Fuikdag a para bira un aktividat tradishonal grandi i ku tempu ta hopi instansia ta ser envolví. Den esaki por hasi menshon di Wardakosta, Polis, Brantwer, Servisio di Ambulans, Krus Kòrá, Inspekshon Marítimo, Kapitan di Haf, Duana, Citro, Seguridat di Santa Barbara Plantation i GMN.